HoREX Baucau rejista pasiente dengue 41
BAUCAU, 30 janeiru 2023 (TATOLI) – Hospital Rejionál Eduardo Ximenes (HoREX, sigla portugés) iha munisípiu Baucau rejista pasiente dengue hamutuk 41 iha fulan-janeiru ne’e.
Diretora klínika HoREX munisípiu Baucau, Umbelina de Almeida, esplika, hosi númeru refere komposta hosi pasiente idade adultu na’in-10, dengue eemorajen fiber na’in-26, na’in-lima kategoria la grave. Hosi númeru ne’e na’in-haat halo transferénsia ba Dili hodi halo tratamentu.
“Sira-ne’e hotu maioria alta fila ba uma ho esforsu hosi pesoál saúde sira, ne’ebé ita konsidera grave ita halo transferénsia ba Dili realasiona ho estoke raan iha HoREX Baucau laiha,” Diretora klínika HoREX Baucau iha Vila Nova, segunda ne’e.
Hosi pasiente na’in-41 refere laiha vítima (mate) ba moras dengue tanba konsege rekuperadu no kontinua halo tratamentu iha HoREX Baucau.
Númeru pasiente dengue sa’e tanba populasaun sira laiha konsénsia kuidadu aan hodi hamoos ambiente nune’e fó oportunidade ba susuk hodi hamosu moras dengue.
“Susuk mai hosi ita-nia konsénsia no menus hosi ita ema-nia koñesementu oinsá ita atu halo ijiene ba arreador idak-idak nian,” Umbelina Almeida akresenta.
Responsável HoREX Baucau apela ba inan aman atu hamoos ambiente no bainhira hetan síntoma isin manas, kabun laran moras no muta tenke lalais ba fasilidade saúde hodi hetan atendimentu.
Jornalista : Natalino Belo
Editór : Evaristo Soares Martins
