DILI, 30 janeiru 2023 (TATOLI) – Konsellu Administrasaun Fundu Infraestrutura (KAFI) sei realiza semináriu kona-ba balansu dezenvolvimentu infraestrutura durante tinan 20.
Vise-Primeiru-Ministru no Ministru Planu no Ordenamentu, José Reis, hatete asuntu ne’e hafoin hasoru malu ho Primeiru-Ministru, Taur Matan Ruak, hodi relata progresu serbisu, iha Palásiu Governu.
“Informa ba Primeiru-Ministru katak KAFI sei halo semináriu nasionál ida kona-ba balansu ba iha tinan 20 ba konstrusaun dezenvolvimentu infraestrutura. Ita la’o loos ka ita la’o ladi’ak”, Vise-Primeiru-Ministru dehan.
Prezidente KAFI ne’e afirma tan katak semináriu ne’e sei diskute kle’an sobre projetu sira, liuliu estrada sira ne’ebé durante ne’e halo seidauk to’o tinan kondisaun aat fali ona.
“Ida ne’e maka ami hakarak promove semináriu ida ne’e hodi haree balansu ne’e, maski mandatu Governu ne’e hotu bele halo rekomendasaun ida ba Governu tuirmai atu haree didi’ak oinsá infraestrutura ne’ebé ita halo ne’e ho kualidade”, governante ne’e afirma.
Tuir planu, semináriu nasionál ne’e sei realiza iha marsu 2023, iha Dili.
Governu prevee millaun $201,743 iha Fundu Infraestrutura iha Orsamentu Jerál Estadu tinan 2023, inklui empréstimu esternu hodi finansia projetu 846, ba programa 26 no sub-programa 70.
Jornalista: Antónia Gusmão
Editora: Maria Auxiliadora
