SASCAS sei apoia sosiedade sivíl hamutuk 191
DILI, 30 janeiru 2023 (TATOLI) – Servisu Sosiedade Sivíl Auditoria Sosiál (SASCAS) sei apoiu iha tinan ne’e ba sosiedade sivíl hamutuk 191 hodi presta servisu ba sosiedade nian.
SASCAS sei apoiu orsamentu ba sosiedade sivíl sira hamutuk milaun $1,5, maibé sei elimina parseiru balun tanba la priénse rekezitu no la konvensidu no la garantidu.
“Loloos ita iha 194 maibé tanba balun ne’ebé mak la priénxe rekezitu ami tenke elemina , entaun agora daudaun ita iha hamutuk 191 mak ita apoiu, hanesan Asosiasaun Sosiedade NGO, Asosiasaun Fundasoes, Grupu Komunidade báziku sira, Organizasaun Rezisténsia, Organizasaun Sosiedade balun ne’ebé mak servisu iha auditoria sosiál inklui konvisaun relijioza naun katolika sira”, Diretór Ezekutivu Servisu Sosiedade Sivil Auditoria Sosiál (SASCAS) Edvin Soares, dehan ba jornalista sira bainhira partisipa atividade FONGTIL iha salaun São José, Katedral, ohin.
“Servisu sira ne’ebé mak presta iha sosiedade sivíl mak multisetorál tebes, tanba ita boot sira haree katak oganizasaun lubuk ida presta servisu iha ortikultura, agrikultura, pekuaria, formasaun, entaun ami labele dehan susesu no la susesu, maibé ami haree kuaze hotuhotu la’o ho diak”, salienta nia.
Iha fatin hanesan Diretór Ezekutivu FONGTIL, Valentim da Costa Pinto, hateten SASCAS durante ne’e apoiu FONGTIL ho objetivu halo advokasia ba komunidade sira iha área rurál.
“Ami nia membru sira durante halo atividade ne’e barak mak halo advokasia no halo servisu umanitaria ne’ebé mak servisu ho grupu alvu hanesan ema (feto) ho difisiénsia iha baze. Entaun ami halo advokasia ida ne’e no hetan apoiu husi SASCAS ne’ebé mak ami foku ba setór haat hanesan saúde agrikultura, edukasaun no infraestrutura bázika ne’ebé mak tinan-tinan ami nia membru sira halo peskiza ba ida ne’e”, informa nia.
Jornalista : Felicidade Ximenes
Editór : Zezito Silva
