DILI, 30 janeiru 2023 (TATOLI)—Prezidente Institutu Kulaidade Timor-Leste, Istitutu Públiku (IQTL, I.P-sigla portugés), Rosito de Monteiro, hateten tinan ne’e, IQTL sei sosa ekipamentu ka mákina teste produtu kualidade item tolu.
Nia dehan, mákina ne’e atu sosa iha tinan kotuk ne’ebe propoin ona, maibé tanba de’it rekursu iha IQTL,I.P ba área aprovizionamentu laiha no orsamentu atu sosa ne’e mós boot maka prosesu ne’e ba fali National Competetive Bidding (NCB) ninian.
“Entaun tinan kotuk nee ami labele hola maibé kontinua réaloka fali orsamentu mai iha tinan ida ne’e, hamutuk $105.000. Tanba ne’e, ita sosa uluk item tolu ba produtu exportasaun,” Rosito de Monteiro dehan ba Agência Tatoli, via telefónika segunda ne’e.
Nia dehan, mákina item tolu ne’ebé IQTL sei sosa mak, ekipamentu teste ba kafé, mina nuu, no bee. Ida ne’e mak sira propoin atu sosa uluk iha tinan ida ne’e.
Mákina tolu ne’e, nia espesífikasaun mak atu kahur hodi bele define kualidade sasán ninian. Ekipamentu ka instrutumentu ne’ebé hodi uza ba análiza ne’e rasik, inklui ekipamentu ba iha meteorolójia ninian.
“Ita sosa uluk mákina item tolu ne’e tanba prioridade liu no bazeia ba pedidu hosi ita-nia parseiru setór privadu sira atu teste ba sira-nia produtu durante halo exportasaun, liuliu kafé, mina nuu no bee. Signifika ita sosa ekipamentu tolu ne’e mai ita estabelse ona laboratóriu nasionál maibé ida ne’e seidauk kompletu tanba item tolu ne’ebé ita sosa ne’e foin halo teste ba exportasaun de’it,” nia dehan.
Nia dehan, kona-ba atu sosa ekipamentu item tolu ne’e, foin tama tinan foun, entaun ekipa tékniku hahú halo ona levantamentu ba ekipamentu sira ne’e, hotu aprezenta proposta no bele hetan aprovasaun ona mak foin hahú prosesu aprovizionamentu.
“Maibé ba ekipamentu item tolu ne’e ita sei sosa tinan ida ne’e, no ekipamentu sira seluk ita sei haree fali ba tinan oin sira ne’e,” nia dehan.
Jornalista : Arminda Fonseca
Editora : Armandina Moniz
