DILI 31 janeiru 2023 (TATOLI) – Iha 2022, aviaun ambulánsia lori pasiente hamutuk 223 hosi munisípiu mai Hospitál Nasionál Guidu Valadares (HNGV) hodi halo trantamentu intensivu, Diretór Jerál Servisu Nasionál Ambulánsia no Emerjénsia Médika ( SNAEM) Horacio Sarmento, dehan ba Tatoli, iha nia kna’ar fatin, Caicoli, ohin.
”Husi janeiru to’o dezembru 2022 aviaun ambulánsia evakua ona pasiente ne’ebé ho moras komplikasaun husi munisípiu mai HNGV hamutuk 223”, dehan Horacio Sarmento.
Nia dehan, pasiente ne’ebé ho moras komplikasaun mak médiku sira labele atende iha munisípiu, entaun aviaun ambulánsia tenke evakua mai nasionál hodi hetan tratamentu espesializadu.
”Aviaun ne’e rasik halo operasaun iha dader tuku 8.00 to’o 17:00 lokraik maibé depende ba klima, se udan, aviaun labele halo movimentu maibé klima kuandu di’ak sira bele transporta pasiente sira”, esplika nia.
Tanba ne’e, Ministériu Saúde mantein halo kooperasaun ho Empreza Mission Aviation Fellowship (MAF) hodi atende nafatin ba pasiente sira ne’ebé moras.
”Operasaun aviaun ambulánsia perkore de’it iha munisípiu ualu, hanesan Atauro, Lautem, Baucau, Viqueque, Manufahi, Covalima, Maliana no RAEOA, restante munisípiu uza de’it karreta ambulánsia tanba besik kapitál”, dehan nia.
Tuir akordu ne’ebé hatuur iha kontratu katak operasaun aviaun ambulánsia, Dili ba Atauro, Governu selu $350, Baucau $720, Lautem $1.070, Maliana $500, RAEOA $1.040, Manufahi $580, Covalima $700 no Viqueque $740.
Jornalista : Felicidade Ximenes
Editór : Zezito Silva
