BAUCAU, 31 janeiru 2023 (TATOLI) – Benefisiáriu Uma Naroman ba Povu (UPN) hosi suku Triloka sente kontente no konsidera benefísia direita ba povu.
Benefisiária Faustina da Costa hosi aldeia Lequiloiwatu, suku Triloka, nu’udar feto faluk ne’ebé ho atividade kada loron hanesan agriklultór moris ho oan na’in-lima ho bei-oan na’in-rua.
Antes ne’e, família ne’e iha uma ho kondisaun grave tanba konstrui hosi rai ho kakuluk du’ut ho medida metru 4 kuadradu, laiha kuartu ne’ebé mak hela durante tinan barak ho maioria membru família kondisaun ema ho defisiente.
“Hau hato’o obrigadu ba governu tanba konstrui ona uma di’ak ba ha’u no família hodi hela ba,” Faustina da Costa hateten iha aldeia Lequiloiwatu, tersa ne’e.
Faustina da Costa, louva ho programa UPN tanba benefísiu dereita ba komunidade ne’ebé ekonomia insufisiente.
Benefisiáriu ne’e husu atu governu kontinua implementa programa refere tanba maioria povu barak kondisaun uma sei aat liuliu iha suku Triloka.
Nune’e mós benefisiáriu Domingos Freitas da Silva, nu’udar mós agrikultór ne’ebé moris ho membru família hamutuk na’in-11 kompostu hosi feen no oan na’in-sia ne’ebé sei fahe kuartu ba oan no balun okupa iha uma anteriór.
Tuir nia, UPN ne’ebé kontrui kualidade di’ak no merese hodi hela ba nune’e agradese ba governu liuhosi Ministériu Administrasaun Estatal (MAE) hodi fó ajuda uma ba povu iha Timor-Leste no ba oin husu kontinua implementa tanba komunidade balun seidauk iha uma ho kondisaun di’ak.
“Ha’u kbiit laek bainhira estadu oferese, ha’u kontente tanba ne’e h’au agradese ba governu,” Domigos Freitas hateten.
Reprezentante Ministru Administrasaun Estatal liuhosi Diretór Jerál Dezenvolvimentu Rurál, Rosito Guterres, esplika, VIII governu konstitusionál konsidera povu mak sai sentru ba dezenvolvementu nune’e liuhosi programa ne’ebé iha implementa mos UPN ba komunidade mesmu fazeadamente.
“Ita hasai benefisiáriu sira hosi uma barraka ba uma ne’ebé seguru reziliente hosi VIII governu,” Rosito Guterres akresenta.
Rosito Guterres salienta, benefisiáriu sia ne’e merese duni hetan subsídiu UPN tanba kondisaun uma hetan estragu tinan barak tanba laiha kbiit atu konstrui uma foun.
Governu rejista rekomendasaun hotu hosi komunidade no kompromete sei kontinua hadi’a kondisaun moris liuhosi programa sira inklui UPN ne’ebé implementa hosi PNDS ne’ebé tuir dadus uma iha territóriu nasionál hamutuk rihun 200 ho kondisaun presiza konstrui foun.
“Ita labele halo hotu iha mandatu VIII governu maibe iha esperansa bainhira diak ba povu, governu ne’ebé deit sei kontinua implementa tanba benefisiu dereita ba povu,” Rosito Guterres akrensenta.
Benefisiáriu na’in-sia ne’e maihosi aldeia tolu hanesan Macadae, Baduho’o no Lequeloiwatu, komposta hosi Faustina Freitas, Virgílio Bosco da Silva, Domingos Freitas, Ricardo da Silva, João Cancio Ximenes, Luisa da Silva, Maria Freitas, Josefina da Conceição no Luiges da Silva ne’ebé komposta hosi feto faluk na’in-ida no na’in-ualu seluk kategoria vulnerável no defisiente.
Suku Triloka hetan alokasaun orsamentu hosi UKL tinan 2022 hamutuk $159.318 ne’ebé fahe ba kategória fundu infraestrutura $153.306 no fundu operasional $ 6.012.
Entertantu, autoridade munisipál Baucau hetan alokasaun orsamentu hosi programa UKL hamutuk tokon $1,802,000.
Hosi totál ne’e finánsia ba atividade fíziku hamutuk tokon $1,734,000 ba suku 34 no despeza operasional $68,000 sei gastu iha munisipál Baucau.
Jornalista : Natalino Belo
Editór : Evaristo Saores Martins
