CNE Oé-Cusse sei rekruta ofisiál 115 prepara ba eleisaun parlamentár 2023
OÉ-CUSSE, 31 janeiru 2023 (TATOLI) – Komisaun Nasionál Eleisaun (CNE, sigla portugés), Rejiaun Administrativa Espesiál Oé-Cusse Ambeno (RAEOA), sei persiza ofisiál supervizaun eleitorál na’in-115 hodi sai observadór nasionál iha eleisaun parlamentár tinan 2023 nian.
“Preparasaun ba eleisaun parlamentár, CNE Oé-Cusse simu ona desizaun no orientasaun hosi nasionál kona-bá prosesu rekrutamentu ofisiál atu superviziona ba iha eleisaun nian, ne’ebé agora daudaun Oé-Cusse hahú loke ona vaga ba públiku atu persiza ofisiál na’in-115,” Direitór CNE Oé-Cusse, Tomás Oqui Meta informa ba Agência Tatoli iha Oé-Cusse, tersa ne’e.
Nia informa, data atu submete dokumentu hahú hosi loron 02 to’o 08 fevereiru, selesaun dokumentu rezultadu taka depois selesaun dokumentu no taka sai rezultadu selesaun dokumentu iha loron 09 to’o 14 fevereiru 2023.
Nune’e iha loron 16 fevereiru hahú teste eskrita ba kandidatu sira-ne’ebé liu selesaun dokumentu, depois kontinua ba korresaun ba rezultadu teste eskrita ne’e, depois taka sai nia rezultadu iha loron 16 to’o 20 fevereiru 2023.
Faze tuir mai maka tama teste orál ka entrevista ba kandidatu ne’ebé liu iha teste eskrita ne’e, hala’o iha loron 22 to’o 25 fevereiru no taka sai rezultadu finál iha loron 27 fevereiru 2023.
“Tama asina kontratu sei hala’o iha loron 01 marsu 2023, depois kontinua hahú tama servisu, formasaun ba kandidatu sira iha loron 06 to’o 10 marsu 2023, no ofisiál na’in-115 ne’e sei koloka sira ba iha sentru votasaun no estasaun votasaun sira iha territóriu Oé-Cusse, no mós halo supervizaun iha atividade eletorál kampaña nian,” nia katak.
Entretantu, tuir dadus Sekretariadu Tékniku Administrasaun Eleitorál (STAE) rejista, totál sentru votasaun estabelese iha Oé-Cusse hamutuk 88 no estasaun votasaun 88 ho totál eleitór provizória iha Oé-Cusse hamutuk 51.495 komposta hosi mane 26.232 no feto 25.263.
Jornalista : Abílio Elo Nini
Editór : Evaristo Soares Martins
