OÉ-CUSSE, 31 janeiru 2023 (TATOLI) –Empreza lokál hamutuk 22 iha Rejiaun Administrativa Espesiál Oé-Cusse Ambeno (RAEOA) aprovadu iha konkursu públiku kona-bá programa cesta bázika nian, no iha fevereiru hahú halo distribuisaun ba komunidade sira iha rejiaun ne’e.
Adjuntu Prezidente Autoridade RAEOA, Maximiano Neno, atuál Sekretáriu Rejionál ba Asuntu Sosiál, informa, rezultadu hosi konkursu ne’e publika ona iha semana kotuk. No daudaun ne’e parte aprovizionamentu fó tempu loron lima ba empreza sira, karik iha reklamasaun kona-bá rezultadu konkursu públiku ne’e.
“Iha inísiu empreza 50 mak kompete iha konkursu públiku cesta bázika nian, maibé iha prosesu avalizsaun dokumentu, empreza 22 mak aprovadu sai manán na’in iha loot 23, signifika empreza ida manán iha loot rua (2), seluk manán loot ida-ida, tanba konkursu ne’e fahe ba loot,” Maximiano Neno, ko’alia iha Oé-Cusse, tersa ne’e.
Adjuntu Prezidente Autoridade RAEOA ne’e fundamenta, bainhira laiha karta reklamasaun liga ho rezultadu publikasaun ne’e, maka iha faze tuir mai atribui karta aseitasaun ba empreza manán na’in-sira hodi selebra kontratu, no kontinua prepara materiál ba faze implementasaun.
“Kalendáriu ba implementasaun lais di’akliu, maibé ajenda fiksa seidauk tanba ita la’o etapa tenke kumpri regulamentu aprovizionamentu, loron lima laiha karta reklamasaun iha avansa ba karta aseitasaun, selebra kontratu no prepara ba faze implementasaun, inísiu fevereiru empreza sira bele prepara kompra sasán semana rua tán bele lansa ona,” nia afirma.
Kona-bá dadus benefisiáriu, Autoridade RAEOA sei mantein lista mai hosi Governu Sentrál, karik iha prosesu implementasaun iha reklamasaun naran laiha lista sei buka solusaun mai hosi desizaun Governu nian.
“Ita sei envolve autoridade komunitáriu atu justifika didi’ak hodi aprezenta ba Governu atu deside, maibé ita mantein dadus ne’ebé aprovadu hosi Governu Sentrál, tanba iha totál populasuan rihun 87-resin ita labele sees hosi dadús ne’e,” nia katak.
Purtantu, valór orsamentu ba implementasaun cesta bázika iha RAEOA hamutuk millaun $4-resin, orsamentu ne’e mai hosi Sekretáriu Estadu Kooperativa (SECoop) no Ministériu Turizmu Komérsiu no Indústria (MTKI).
“Orsamentu ne’e envolve prosesu tomak, implementasaun cesta bázika, kustu operasionál atu rekruta traballadór iha programa ne’e,” nia afirma.
Empreza manán-na’in sira
Empreza 22 ne’ebé aprovadu iha konkursu públiku ne’e maka hanesan, iha sub-rejiaun Pante Makasar sei distribui hosi empreza sira hanesan, Reginaldo Unipesoál Lda ho valór orsamentu $677,600.00, sei distribui ba aldeia Sanane, Oésono iha suku Costa, Reviver Unipesoál,Lda, ho valór orsamentu $130,333.50 sei distribui ba suku Lalisuk.
Nune’e mós empreza Suni Lake Sombai Unipesoál Lda ho valór orsamentu $46,407.00 sei distribui ba aldeia Noapai, suku Cunha, Neno Unipesoál Lda ho valór orsamentu $147,744.96 sei distribui ba aldeia Mahata, Lakufoan no Oétfo iha suku Costa, Pandi Silnes unipesoál Lda ho valór orsamentu $37,272.13 sei distribui ba aldeia Usapibela suku Lalisuk.
Empreza Nun Mabun Unipesoál Lda, ho valór orsamentu $252,996.75, sei distribui ba aldeia Noeninen, Noafafo, Maunaben no Umenoah suku Cunha, AECSSL Unipesoál Lda ho valór orsamentu $178,503.00 sei distribui ba suku Lifau.
Uma Oli Unipesoál Lda ho valór orsamentu $335,431.97, sei distribui ba suku Taiboko, Tafen Kuan Unipesoál Lda ho valór orsamentu $100,594.00, sei distribui ba suku Nipani, Tafen Kuan Unipesoál Lda ho valór orsamentu $156,364.25, sei distribui suku Bobakase.
Empreza Dinhola Unipesoál Lda ho valór orsamentu $266,907.88, sei distribui ba suku Naimeko no mós empreza Matlalan Unipesoál Lda ho valór orsamentu $33, 233.00, sei distribui ba aldeia Kutete, suku Costa, Bitimo Unipesoál Lda ho valór orsamentu $38,464.25 sei distribui ba aldeia Lamas, suku Bene-Ufe.
Iha sub-rejiaun Nítibe maka empreza Neon Bahan Unipesoál Lda ho valór orsamentu $113,200.00, sei distribui ba suku Suni-Ufe, Save Guard Unipesoál Lda ho valór orsamentu $232,174.50, sei distribui ba suku Lela-Ufe.
Empreza Erihjocia Unpesoál Lda, ho valór orsamentu $162,409.28, sei distribui ba suku Usitaku, Neldy Unipesoál Lda, ho valór orsamentu $124,575.30, sei distribui ba aldeia Manan ho Citrana suku Bene-Ufe. Nune’e mós loja Sapa’an Unipesoál Lda ho valór orsamentu $121,022.32, sei distribui ba suku Ban-Afi.
Iha sub-rejiaun Oésilo, Biqae Green Unipesoál Lda ho valór orsamentu $451,232.50, sei distribui ba aldeia sia (9) iha suku Bobometo, My Love Star Unipesoál Lda ho valór orsamentu $202,280.40 sei distribui ba aldeia tolu (3) iha suku Usitasa’e no mós empreza Joana Bobo Tanu Unipesoál Lda ho valór orsamentu $61,107.20 sei distribui iha suku Usitaqueno.
Iha sub-rejiaun Pássabe empreza Sufnentimo Nafael Unipesoál Lda ho valór orsamentu $375,593.94, sei distribui ba suku Abani, Saukira Unipesoál Lda ho valór orsamentu $94,460.70, sei distribui iha suku Malelat.
Jornalista: Abílio Elo Nini
Editór: Evaristo Soares Martins
