Komunidade preokupa ho SKRN Covalima atende kliente trata sertidaun RDTL
COVALIMA, 31 janeiru 2023 (TATOLI)–Reperzentante komunidade Covalima, Jorge Ferreira, preokupa ho kritéria no atendimentu funsionáriu Servisu Konservatóriu Rejistu no Notariadu (SKRN) Covalima ba komunidade atu trata dokumentu Sertidaun RDTL.
“Uluk ami mai iha ne’e presiza dokumentu fixa família, lakle’ur de’it mosu tan sistema foun-ida, presiza tan inan aman-nia RDTL, ida-ne’e sai preokupasaun boot ida ba ami, hela iha área rurál. Ami mai iha-ne’e lakon tempu, entaun ami la satisfas ho sira-nia sistema,” Jorge Ferreira hateten nia lamentasaun ne’e ba jornalista sira, iha resintu SKRN, tersa ne’e.
Nia husu, tuir loloos servisu notariadu tenke informa ba sidadaun sira molok sidadaun-sira atu trata dokumentu.
“Lolos-ne’e sira tenké fo hatene uluk ba ami katak, imi mai iha ne’e tenke lori dokumentu sira hanesan nune’e ami mai ne’e, bele prepara kedas. Agora ami mai to’o iha ne’e, sira foin fo hatene ami entaun ami tenke fila ba foti dokumentu, ne’e ami lakon tan osan ba transporte. Ida-ne’e mak ami la satisfas,” nia hateten.
Ho nune’e, servisu notariadu tenke hadi’a sistema atendimentu atu labele povu sira gasta osan ba transporte.
Diretor Servisu Konservatóriu Rejistu no Notariadu (SKRN) Covalima, António Sarmento, esplika sistema jerál atu trata sertidaun moris RDTL ninia kritéria tenke lori sertidaun batizmu, Eleitorál no sertidaun inan no aman nian.
“Atu halo sertidaun Nascimento RDTL persiza duni sertidaun inan-aman nia dokumentu, tanba iha ne’eba ita la haree de’it ba dadus rekerente sira-ne’ebé atu trata maibé sei haree mós ba inan-aman nia dadus sira, inan-aman nia naran, loron moris, fatin-moris, ita mós sei haree mós avo hosi inan no aman nian,” nia hateten.
Razaun sidadaun rekerente atu trata sertidaun Nascimento RDTL presiza dokumentu hosi inan no aman, tanba dala barak rekerente sira mai balun komplikadu iha naran inan no aman nian lahanesan iha sertidaun batizmu.
Tuir observasaun Agência Tatoli nota katak oras ne’e daudaun sidadaun sira iha munisípiu Covalima antri atu trata dokumentu sertidaun RDTL.
Jornalista : Celestina Teles
Editór : Cancio Ximenes
