Konsellu veteranu sei halo reverifikasaun dadus veteranu simu ona subvensaun
COVALIMA, 31 janeiru 2023 (TATOLI)–Prezidente Konsellu Munisípiu Covalima, Osório Soares “Mausoko”, informa Konsellu Veteranu Covalima sei halo reverifikasaun ba veteranu no martir sira-ne’ebé simu ona subvensaun kada fulan.
“Ami sira-ne’ebé veteranu grau 18-14 mós sei halo reverifikasaun, tanba balun halo manipulasaun hanesan monu iha ai-leten, mota mak lori no tama HANSIP uluk tiru malu ho FALINTIL iha ai-laran mós grau 18-14 ne’e konfuzaun,” Osorio Soares “Mausoko” hateten ba Agência Tatoli, iha Tabakolot, tersa ne’e.
Komisaun sira halo rejista iha tinan 2003 ne’e, responsavél ho sekretáriu zona sub-rejiaun no sekretáriu Nurep lahatene, tanba iha momentu ne’e hosi nasionál mak halo verifikasaun la konsulta ho sekretáriu iha munisípiu.
Tuir loloos atu halo verfikasaun tenke koordena ho sekretáriu zona sub-rejiaun, Nurep, Sselkom no responsavél kaixa husu informasaun foin bele halo verifikasaun.
“Ha’u hato’o kedas verifikasaun 2003 to’o 2005 sira hosi nasionál mak sei tama hotu kadeia la’ós ami responsavél munisípiu mak atu tama kadeia ne’e lae,” nia dehan.
Tanba, ema-ne’ebé nia partisipasaun hanesan komadante kompaña tun mai tuur iha estrutura no iha sekretáriu zona nia grau la hetan 15-19 maibé hetan fali grau 18-14, no ida-ne’ebé hanesan labarik sei kiik iha ai-laran tun mai halo klandestina ne’e nia mak hetan 15-19.
Bazea dadus iha konsellu veteranu Covalima veteranu no martir ne’ebé simu subvensaun hosi postu administrativu hitu (7) iha munisipiu Covalima hamutuk 2000-resin.
Jornalista : Celestina Teles
Editór : Cancio Ximenes
