iklan

EKONOMIA, BAUCAU, HEADLINE, MUNISÍPIU

MAE husu administradór postu implementa didi’ak PMOPA 2023

MAE husu administradór postu implementa didi’ak PMOPA 2023

Diretór Jerál Dezenvolvimentu Rurál hosi Ministériu Administrasaun Estatál, Rosito Guterres. Imajen Agência TATOLI/Natalino Belo.

BAUCAU, 31 janeiru 2023 (TATOLI) –  Ministériu Admistrasaun Estatal (MAE) liuhosi Diresaun Dezenvolvimentu Rurál husu ba Administradór Postu Administrativu hotu atu implementa didi’ak Programa Mão de Obra Postu Administrativu (POMPA) tinan-2023 benefísia direta ba povu.

Diretór Jeral Dezenvolvimentu Rural MAE, Rosito Guterres, husu, admistradór postu hotu tenke utiliza orsamentu POMPA ho responsabilidade no hadia aktividade tinan-2022 nian implementa iha tinan-2023 hodi kria aktividade produtivu iha kada suku.

“Orsamentu ne’e hosi Orsamentu Jerál Estadu (OJE) tanba ne’e tenke utiliza ho kuidadu tanba ne’e husu atu tenke aloka direta ba komunidade hodi kontribui ba rekuperasaun ekonomia,” Diretór Jerál Dezenvolvimentu Rurál hateten iha Lequeloiwatu, suku Triloka, tersa ne’e.

Programa refere inísia iha tinan-2022 no hahú implementa iha postu administrativu hotu iha territóriu nasionál ne’ebé benefísia hodi kontribui ba rekuperasaun ekonomia iha baze liuhosi kria kampu serbisu informál ba komunidade.

Parte diresaun hamutuk ho implementadór sira sei hadi’a atividade hotu nune’e programa refere bele kria kampu traballu informál ba komunidade hodi ajuda hadi’a ekonomia iha rurál.

“Tinan-ne’e, PMOPA sei foku ba atividade produtivu sira, hanesan reflorestasaun, manutensaun kiik ba estrada rurál,” Rosito Guterres akresenta.

Orsamentu ba PMOPA ba munisípiu Baucau iha tinan-2023 hamutuk $600.000 ba postu administrativu neen ne’ebé fahe ba kustu operasionál hamutuk $ 30.000 no ba kustu subvensaun $570.000 ho totál atividade hamutuk 279 no traballadór hamutuk 5.588.

Governu liuhosi MAE aloka orsamentu hamutuk millaun $6 hodi implementa PMOPA tinan-2023 ne’ebé kada postu administrativu sei hetan alokasaun orsamentu $100.000 ne’ebé pursentu 20 ba kustu operasionál no pursentu 80 kustu fíziku.

Jornalista        : Natalino Belo 

Editór                : Evaristo Soares Martins 

iklan
iklan

Leave a Reply

iklan
error: Content is protected !!