iklan

NASIONÁL, EKONOMIA, HEADLINE

Ministériu Turizmu estabelese ona Loja do Povo hamutuk hitu

Ministériu Turizmu estabelese ona Loja do Povo hamutuk hitu

Ministru Turizmu, Komérsiu no Indústria, José Lucas do Carmo da Silva. Imajen// TATOLI

DILI, 31 janeiru 2023 (TATOLI) – Ministériu Turizmu, Komérsiu no Indústria (MTKI), liuhosi Diresaun Nasionál Komérsiu Internu kria ona “Loja do Povo” hamutuk hitu.

Estabelesimentu “Loja do Povo” ne’e liuhosi kontratu entre Governu no empreza ka grupu ho osan montante ba kada empreza rihun $50. Kriasaun loja ba dahuluk mak Cesária Lari Tame, Unipessoal Lda, grupu Cooperativa Camponês Maubere (CCM) iha Dili; Kooperativa Multi-setorál, empreza Monica dos Santos, Unipessoal Lda, iha Ainaro; no Kooperativa Mua Tchau, Cipriano Feliz, Unipessoal Lda, iha Lautém.

Iha 2022, ministériu asina tan kontratu ho empreza haat ho osan ba kada ho valór rihun $50. Grupu sira ne’e mak Casa Nova Fresca, Unipessoal Lda, grupu Comvaça iha Dili; Hibahitirokap Nunes, Unipessoal Lda, grupu Produtores Same; Putri Lialuli, Unipessoal Lda, iha Covalima; no Maubere Spirit, Unipessoal Lda, iha Baucau.

Ministru Turizmu, Komérsiu no Indústria, José Lucas do Carmo da Silva, hatete iha programa entrevista eskluziva iha estúdio Agência Tatoli katak kriasaun loja sira ne’e atu responde ba preokupasaun husi agrikultór sira kona-ba merkadu ba produtu ne’ebé sira prodús.

“Ho estabelesimentu Loja do Povo oinsá atu simu produtu lokál husi povu sira hodi fa’an. Ne’e faze ida governu loke espasu merkadu ba povu agrikultór sira hodi fa’an sira-nian produtu”.

Governante ne’e husu ba kompañia ne’ebé mak asina ona kontratu ho ministériu atu asume responsabilidade hanesan timoroan hodi konsidera agrikultór no grupu hothotu.

“Husu atu akomoda agrikultór sira hotu nia produtu atu nune’e iha duni sentidu katak governu serbí ba nia sidadaun sira hotu. Hakarak relembra maski ita ho pilotu ki’ik, maibé nia sustentabilidade no nia benefísiu ba timoroan, liuliu agrikultór sira. Ne’e hanesan oportunidade, maibé husu atu tane aas responsabilidade”, nia afirma.

Tuir planu, iha 2023, MTKI orsamenta ona rihun $250 atu estabelese tan loja refere iha munisípiu Aileu, Ermera, Bobonaro, Liquiçá no Viqueque.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!