DILI, 31 janeiru 2023 (TATOLI)–Primeiru-Ministru, Taur Matan Ruak, tersa ne’e, inaugura Eskola Koléjiu Ensinu Sekundáriu Tékniku Vokasionál (TEKVOK) Maria Regina Guterres iha suku Wenunuk, Metinaro, ne’ebé konstrui hosi fundu privadu ho montante rihun $50.
“Ha’u apresia tebes inisiativa di’ak ida-ne’ebé prezidente fundasaun eskola ne’e kria ona hodi harii eskola Tékniku Vokasionál ida ba joven sira atu apreende kona ba kontabilidade. Ha’u fiar katak eskola ne’e sei buras no boot liután,” PM Taur hateten iha diskursu iha serimónia inaugurasaun eskola ESTV Koléjiu Maria Regina Guterres iha suku Wenunuk, postu administrativu Metinaro, munisípiu Dili, segunda ne’e.
Xefe Governu ne’e apresia tebes bainhira rona istória kona-ba prosesu harii eskola TEKVOK Koléjiu Maria Regina Guterres ne’ebé hahú hosi manu-luhan depois muda ba fahi-luhan no ikus mai harii eskola Ensinu Sekundáriu Tékniku Vokasionál ida iha suku Wenunuk Metinaro ne’e.
Ida-ne’e, nia dehan, lideransa hosi Prezidente fundasaun iha duni vontade persisténsia, tanba ne’e PM fó hanoin katak nu’udar eis militár sira iha liafuan ida hateten “A derrota e amãe de vitória” hodi inspira ema iha vontade makaas atu hetan susesu.
Tanba ne’e, Xefe Governu fó parabens ba inan-aman sira-ne’ebé mak fó ona apoiu makaas liu-liu manorin sira-ne’ebe preparadu ona atu hala’o prosesu ensinu aprendizajen iha eskola ne’e no ba parseiru sira-ne’ebé apoiu ona material.
Fundadór Fundasaun Santa Maria Regina, Azevedo Lourenço da Costa Marçal, hateten Koléjiu Eskola Tékniku Vokasionál (TEKVOK) Maria Regina Guterres harii ho orsamentu privadu hamutuk rihun $50 ba edifísiu ida ho sala-de-aula neen (6), sala-de-aula haat (4) sei uza ba prosesu ensinu aprendizajen no sala-de-aula rua (2) sei uza hodi instala fasilidade komputadór hamutuk 30 ne’ebé apoiu hosi parseiru sira.
Eskola ensinu sekundáriu Tékniku Vokasionál ne’e akumula ona estudante hamutuk 36 ne’ebé sei foku sira-nia estudu iha departamentu kontabilidade, tanba nesesidade merkadu traballu.
Tuir nia, Koléjiu Maria Regina Guterres harii ho objetivu atu transforma mentalidade jerasaun foun sira-nian atu prepara an hodi kompete iha mundu globalizasaun ne’ebé ohin loron kuaze merkadu traballu sira iha mundu ezije.
Tanba ne’e, atu garante kualidade ensinu aprendizajen iha eskola TEKVOK Koléjiu Maria Regina Guterres ne’e, iha profesór hamutuk 27 mak mai ho grau akadémiku ne’ebé adekuadu atu garante kualidade ba eskola ne’e.
Profesór sira-ne’e iha hotu abilidade mínimu lisensiatura no agora iha profesór na’in-hitu (7) mak sei hanorin full time no na’in-20 sei hanorin iha parte tempu de’it.
Entretantu estudante na’in-36 ne’ebé eskola iha ensinu sekundáriu tékniku vokasionál ne’e hela iha koléjiu, atu nune’e eskola bele kontrola partisipasaun estudante sira-nian iha formasaun nia laran. sira sei hetan teoria no prátika durante tinan tolu nia laran iha área kontabilidade.
Jornalista : Tomé Amado
Editór : Cancio Ximenes
