RAEOA instala plaka toponímia 767 iha edifísiu públiku no privada
OÉ-CUSSE, 31 janeiru 2023 (TATOLI) – Prezidente Autoridade RAEOA, Arsénio Paixão Bano, tersa ne’e halo lansamentu ba instalasaun plaka toponímia númeru polísia hamutuk 767 hodi instala ba edifísiu públiku sira no uma privada iha sub-rejiaun Pante Makasar Oé-Cusse.
Projetu ne’e prepara no dezeña liuhosi Unidade Ordenamentu no Kadastrál ne’ebé tutela iha Gabinete Prezidente Autoridade RAEOA.
Nune’e mós prosesu instalasaun plaka Toponímia ne’e iha tipu rua hanesan plaka númeru Polísia akrilit hamutuk plaka 10 no plaka alumíniu hamutuk plaka 757 ne’ebé instala hahú hosi fronteira Sakatu Wini, Repúblika Indonézia to’o zona sentrál sub-rejiaun Pante Makasar
Prezidente Autoridade RAEOA, Arsénio Paixão Bano, informa, projetu instalasaun ne’e sei fasilita di’ak liután organizasaun Oé-Cusse nian tanba bainhira presiza fatin ruma atu vizita fasil bele asesu liuhosi sítiu online goolge-map.
“Projetu ne’e sei ajuda RAEOA atu identifika númeru kada fatin no rezidénsia, ita iha ona projetu ba naran dalan públiku sira, entaun númeru ba uma importante ba vizitante inklui rai na’in, bainhira presiza ba fatin ruma ka edifísiu públiku na uma privada, sira-nia númeru instala ona, nune’e fasil bele hatene,” Prezidente Autoridade RAEOA, Arsénio Paixão Bano hateten.
Tuir nia, projetu ne’e benefisíu sei barak, Oé-Cusse ba futuru sei iha mudansa tanba sei uza mós google-map, ne’ebé fatin sira iha google-map ho uma sira-ne’e identifikadu, aban bainrua vizitante ruma ka Oé-Cusse oan trasik lori karreta fasil tebes ba atu hatudu dalan ne’ebé loos tanba uma no fatin instala ona ho númeru.
“Projetu ne’e sei lori Oé-Cusse atu hanesan ho rai seluk, hanesan Indonézia, Austrália, Singapura tanba Oé-Cusse, hahú tau númeru kada uma sira, fatin, ne’ebé ha’u husu empreza servisu hamutuk atu projetu ne’e la’o lalais tuir termu kontratu ne’ebé selebra ona,” nia katak.
Nune’e nia enkoraja empreza, serbisu ne’e tenke la’o tuir nia kontratu garante kualidade tanba ne’e orsamentu Estadu nian, entaun fulan tolu serbisu ne’e tenke hotu,
Entetantu, totál orsamentu ba projetu ne’e $11,783.75, orsamentu ne’e autoridade aloka hosi Orsamentu Jerál Estadu (OJE) 2022 nian durasaun servisu fulan tolu, no projetu ne’e ezekuta hosi Taeki Kase, Unip Lda.
Notísia relevante: RAEOA aloka $44.986,47 ba projetu Toponímia
Jornalista: Abílio Elo Nini
Editór: Evaristo Soares Martins
