DILI, 31 janeiru 2023 (TATOLI) – Diretór Nasionál Ambulánsia Emerjénsia no Medikamentu (SNAEM.IP) Horacio Sarmento, rekoñese karreta ambulánsia iha teritóriu nasionál la sufisiente hodi transporta pasiente sira bainhira presiza.
“Kareta ambulánsia ne’ebé mak daudaun ne’e iha teritóriu nasionál hamutuk 26, maibé la sufisiente atu atende ba pasiente sira”, Horacio Sarmento dehan iha nia kna’ar fatin Caicoli, ohin.
Nia sita katak husi kareta ambulánsia 26, munisípiu Dili iha neen, tanba kapitál ho área ne’ebé luan, bainhira iha situasaun ruma akontese presiza iha ekipa ambulánsia atu halo atendimentu. Ambulánsia hirak ne’e, ida iha estasaun Becora, ida iha Comoro, ida iha sentrál Caicoli, ida halo movimentu no rua seluk standby ba VIP.
Husi númeru ambulánsia ne’ebé iha Dili, dalaruma xamada sira husi komunidade barak tebes no ambulánsia mak la to’o, tanba loron ida de’it simu xamada 15 to’o 20 no ita atende neneik maibé komunidade balun uza sira nia transporte rasik hodi transporta pasiente ba fasilidade saúde tanba lakohi hein ambulánsia ne’ebé to’o tarde.
“Ita hakarak aumenta ambulánsia ho unidade 10 tan, maibé orsamentu ne’ebé ita tau ho montante rihun $650 mak la hetan aprovasaun”, afirma nia.
Iha fatin hanesan, Diretór Nasionál Administrasaun Planeamentu no Finansas iha SNAEM.IP, José Celestino Perreira, informa karreta ambulánsia loloos hamutuk 52 iha teritóriu nasionál maibé balun halo manutensaun entaun iha de’it 26 mak halo operasaun.
“Agora daudaun kareta ambulánsia ne’ebé mak hala’o operasaun iha teritóriu nasionál hamutuk 26, entaun númeru ida ne’e limita tebes atu atende ba komunidade sira ne’ebé mak presiza. Ami halo esforsu ba OJE 2023, ami hatama hotu planu atu kompra ambulánsia ho unidade 10, maibé Ministériu Finansas la responde ba ida ne’e, entaun afeta tebes ba ami nia servisu ambulánsia iha teritóriu nasionál”, dehan José.
José hateten katak agora daudaun ambulánsia kuaze tinan lima ba leten ona, dalaruma ninia kondisaun ladún seguru, maibé karik ba 2024, proposta ruma kona-ba orsamentu atu kompra karik bele konsidera netik atu halo atendimentu ba komunidade sira.
Jornalista : Felicidade Ximenes
Editór : Zezito Silva
