SSM Viqueque kontinua esforsu hadi’a kualidade atendimentu ba pasiente
VIQUEQUE, 31 janeiru 2023 (TATOLI)— Diretór Serbisu Saúde Munisípiu (SSM) Viqeuque, Pedro da Silva Freita, hateten, kontinua esforsu atu hadi’a kualidade rekursu hodi fó atendimentu ba komunidade sira ne’ebé presiza tratamentu médiku.
“Ha’u simu responsavél koko atu hadi’a ita-nia Internamentu tanba iha Viqueque Internamentu de’it laiha Ospitál. Entaun ida-ne’e maka ha’u hakarak atu hadi’a rekursu hodi reforsa serbisu atendementu ba pasiente sira-ne’ebé hala’o tratamentu,” Diretór ne’e hateten ba Agência Tatoli, iha ninia knaar fatin, tersa ne’e.
Atu hadi’a kualdiade atendimentu, Resposavél ne’e afirma halo ona kontratu ho Enfermeiru ho nivél edukasaun husi baixarelatu no lisensiatura sira hamutuk ema na’in-tolu hodi halo rotasaun ba serbisu atendementu ba pasiénte sira iha internamentu.
“Ita-nia Enfermeiru sira ne’ebé uluk serbisu iha Indonézia nian tempu to’o agora sira ne’e. Nune’e bele halo rotasaun hahú dader, meudia no kalan hodi serbisu bele la’o di’ak”, katak.
Resposavél ne’e mós rekoñese presiza duni aumenta rekursu umanu, tanba pesoál saúde balun idade ona ne’ebé iha tempu kalan sira defisil atu halo atendimentu.
“Dala ruma moras mai barak liu, ita-nia pesoál saúde sira mak la to’o tanba ne’e mak ha’u hakarak presiza aumenta ema na’in rua, hodi bele tama dader, meudia no kalan kompostu husi doutór no Enfermeiru hodi fó atendementu ba ita-nia pasiénte sira”, nia afirma.
Daudaun ne’e, pesoál saúde ne’ebé serbisu iha Internamentu Viqueque kompostu husi enfermeiru na’in-haat no Doutór na’in-haat no parteira iha sentru B na’in-haat, fasilidade sira-ne’ebé iha sentru Internamentu Viqueque kama hamutuk 24.
Jornalista : Vitorino Lopes da Costa
Editór : Florencio Miranda Ximenes
