DILI, 31 janeiru 2023 (TATOLI)—Xefe Suku Leorema, Postu Administrativu Bazartete, Munisípiu Dili, Sandra de Araújo, hateten suku Leorema rejista reklamante ba subsídiu $200 hamtuk xefe família 75.
“Iha Leorema nian xefe família 75 mak tama iha lista reklamasaun nian hosi totál benefisiáriu 1.895 no ha’u entrega ona ba parte relevante sira,” nia dehan ba Tatoli liuhosi telefónika, tersa ne’e.
Tuir nia, ema-ne’ebé mak la simu subsídiu iha 149 maibé ne’e inklui ona ho ema balun ho rendimentu mensal $500 ka liu, balun asesu fali iha suku seluk no iha balun ne’ebé la konsege no iha xefe família ida mak lakohi mai simu tanba ho razaun balun.
“Xefe família hamutuk 1.895 ho nia osan $387.000, no hosi númeru ne’e ami selu ona xefe família 1.746 ho nia osan $349.200. Ami sei iha saldo ne’ebé depozita ne’e $29.800,” nia dehan.
Tuir dadus hosi MSSI hatudu katak ekipa pagamentu selu ona uma-kain hamutuk 308.000-resin hosi totál benefisiáriu 339.954 ne’ebé mak iha nasionál hamutuk 318.570 no Rejiaun Administrativa Espesiál Oé-Cusse Ambeno (RAEOA) hamutuk 21.384 no osan ne’ebé mak selu ona hamutuk $61.673.600 ho osan alokadu $ 67.990.800.
Bazea ba Dekretu-Lei Nú. 37/2022, 25 maiu, ne’ebé mak hetan alterasaun hosi Dekretu-Lei Nú. 82/2022, 11 novembru, katak uma kain ka benefisiáriu sira-ne’ebé mak elizivél ba programa subsídiu fim do ano mak uma kain hirak ne’ebé laiha ninia membru uma kain hetan rendimentu kafa fulan ho forma regulár $500 ka liu, nomós uma kain ne’ebé rejistu ona iha livru rejistu suku iha teritóriu nasionál to’o loron 28 de 2022.
Jornalista : Osória Marques
Editór : Cancio Ximenes
