Autoridade Triloka finaliza ona reabilitasaun sede suku
BAUCAU, 01 fevereiru 2023 (TATOLI) – Autoridade suku Triloka, postu administrativu Baucau Vila finaliza ona programa Reabilitasaun Sede Suku (RSS) liuhosi orsamentu Programa Nasionál DezenvolvImentu Suku (PNDS) tinan 2022 nian.
Xefe suku Triloka, Alexandre da Costa, esplika, implementasaun programa refere finaliza iha fim do ano tinan-2022 ho valór orsamentu $ 12.000 hodi halo reabilitasaun
“Fasilita tebes, tanba uluk estragus no ami hetan ajudu tán komputadór no ekipamentu seluk nune’e fasilita ami halo atendimentu ba komunidade ho di’ak,” Xefe suku Triloka hateten iha Lequeloiwatu, tersa ne’e
Suku Triloka implementa projetu hosi PNDS tinan 2022 hamutuk orsamentu $ 12,217.306 hosi projetu lima.
Projetu lima refere komposta hosi Uma Naroman ba Povu (UNP) $153.306, Rezilénsia Komunitária no Rekuperasaun Ekonomia (RKRE) hamutuk orsamentu $ 27.000, bee-mos espesiál $37.000, UNP + B liuhosi distribuisaun kalen hosi nasionál no RSS orsamentu hamutuk $12.000.
Hosi projetu lima refere tolu mak finaliza ona hanesan UNP, UNP + B no RSS. Enkuantu rua seluk hanesan RKRE no bee-mos hein kompleta pursentu 10 hodi finaliza iha tempu badak.
Suku Triloka komposta hosi aldeia haat hanesan aldeia Aubaca, Baduho’o, Macada’e no Leciloiwatu ho totál populasaun 2.700 hosi xefe família hamutuk 607.
Jornalista : Natalino Belo
Editór : Evaristo Soares Martins
