Top

Demokrasia sai baze ba Japaun no Timor-Leste nia amizade

Embaixadór Japaun iha Timor-Leste, KIMURA Tetsuya. Imajen Tatoli/Francisco Sony

DILI, 01 fevereiru 2023 (TATOLI)—Embaixadór Japaun ba Timor-Leste, KIMURA Tetsuya, hateten Japaun no Timor-Leste fahe valór di’ak barak kona-ba demokrásia, Estadu direitu no direitu umanu ne’ebé sai hanesan baze importante ba nasaun rua nia amizade no kooperasaun.

Embaixadór KIMURA Tetsuya hateten, ohin hala’o vizita kortejia mai Parlamentu Nasionál (PN) hodi hasoru malu ho Prezidente Parlamentu Nasionál, Aniceto Longuinhos Guterres Lopes, tanba nia-parte foin to’o iha Timor-Leste iha tinan kotuk fulan dezembru.

Vizita ne’e ho objetivu hodi troka ideia ho Prezidente Parlamentu Nasionál (PN) oinsá hametin liután kooperasaun entre nasaun rua no mós ho Parlamentu Nasionál.

“Ha’u sente Japaun ho Timor-Leste fahe valór di’ak barak hanesan demokrásia, Estadu direitu no direitu umanu, entaun ida-ne’e sai hanesan baze importante ida ba ita-nia amizade no mós kooperasaun,” nia hateten ba jornalista sira hafoin ramata enkontru ho Prezidente Parlamentu Nasionál iha PN, kuarta ne’e.

Nia impresionadu tebes ho dezenvolvimentu Timor-Leste nian iha tinan 20 liu-liu haree ba demokrásia, Estadu direitu ho direitu umanu.

“Ha’u hato’o ba Prezidente Parlamentu katak uluk antes restaurasaun indepedénsia, ha’u serbisu ona iha Timor-Leste. Depois tinan 20, ha’u mai fali Timor-Leste sente impresionadu tebes ho dezenvolvimentu nasaun ne’e nian no liu-liu ha’u mós komentáriu dezenvolvimentu ba demokrásia, Estadu direitu ho mós direitu umanu ne’ebé importante tebes,” Embaixadór ne’e hateten.

Hanesan Diplomata, nia hato’o ba Prezidente PN katak  Governu no  povu Japaun entuziasmu hodi fó asisténsia iha área oioin ba Timor-Leste durante tinan 20 nia laran to’o mai ohin loron ne’e.

Iha parte seluk, nia hato’o mós ba Prezidente PN kona-ba dokumentu ne’ebé mak sei asina hosi JAICA ho Ministéiru Finansa (MF) ba reabilitasaun aeroportu internasionál Nicolau Lobato, no ko’alia mós interkámbiu ema ba ema ne’ebé daudaun ne’e iha faze diskusaun téknika hala’o daudaun, Japaun ho Timor-Leste hodi haruka traballadór timoroan ba  serbisu iha Japaun.

“Espera tempu badak sei iha akordu realiza, ne’ebé sei haruka joven timoroan hodi ba hala’o estájiu ho Japaun. Aleinde ne’e, sira hetan saláriu hetan mós koñesimentu teknolójia iha Japaun, bainhira fila mai bele kontribui ba dezenvolvimentu Timor-Leste nian,” nia dehan.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!