DILI, 01 fevereiru 2023 (TATOLI) – Eis Ministru Interiór Rogerio Tiago Lobato, husu ba Governu atu fó importánsia ba dezenvolvimentu Falintil-Forsa Defeza Timor-Leste,(F-FDTL) atu sai forsa armada ne’ebé profisionál iha futuru.
Rogerio hato’o posizaun ne’e tanba haree hosi transformasaun Falintil ba Forsa Defeza Timor-Leste (FDTL) ne’ebé kompleta ona ninia ezisténsia ba dala-22, maibé haree hosi aspeitu materiál forsa armada Timor-Leste nian sei menus.
“Ha’u orgullu no kontente haree forsa armada Timor-Leste ne’ebé ohin loron kompleta ona sira nia ezisténsia ba dala-22, hanesan eis Ministru Interiór, husu Governu atu investe iha ekipamentu ba ita-nia militár sira, tempu ona ita dezenvolve ita-nia forsa atu sai forsa ne’ebé maka profisionál hanesan mós nasaun seluk”, Rogerio dehan iha Kuartél Jerál F-FDTL Fatuhada, kuarta ne’e.
Nia dehan, mundu ohin loron presiza investe fasilidade ba forsa sira atu bele kombate ameasa sira hosi liur.
“Ita hotu hatene katak iha rai barak hanesan Singapura ita haree sira investe ba iha sira-nia militár ho orsamentu ne’ebé bo’ot, ita-nia Governu tenke iha obrigasaun atu haree ona hodi tau osan bo’ot hodi investe ba ekipamentu militár, atu ita-nia militár sira bele moderniza no bele profisionaliza sira-nia aan”, subliña Rogerio.
Nia esplika, nasaun sira iha fasilidade sufistikadu atu kombate ameasa sira, tanba haree hosi mundu agora nasaun barak mak ekipamentu funu mais avansadu hanesan ekipamentu detesaun ameasa nasaun seluk sira iha.
“Ita haree dala ruma nasaun balun moderniza ona sira nia forsa ho ekipamentu modernu hanesan ekipamentu drom nasaun seluk bele uza halo deteta ameasa rai liur, tanba mundu agora ameasa bele ho maneira ne’ebé konvensionál, tanba ha’u sempre husu ba Governu atu tau atensaun ba ekipamentu ba ita-nia forsa sira”, revela Rogerio.
Iha fatin hanesan, Prezidente Komisaun B Parlamentu Nasionál (PN), José Agostinho Siqueira ‘Somotxo’, hateten kona-ba asuntu militár, Parlamentu Nasionál sempre tau prioridade liuliu iha fasilidade.
“Hanesan Prezidente Komisaun B sempre tau prioridade ba asuntu Defeza Nasionál, liuliu haree ba sira nia lejislasaun sira no ba kestaun finanseiru militár nia, ami sempre fó prioridade, tanba konsidera katak buat sira ne’e atu kontribui ba dezenvolvimentu, profisionalizmu ba ita-nia forsa armada nia”, katak nia.
Nia dehan, maske PN levanta makas hodi husu Governu atu tau prioridade ba kestaun ida ne’e, maibé Parlamentu mós labele hakat liu nia kbi’it ne’ebé mak lei atribui.
“Deputadu sira iha nia kompeténsia própriu atu halo saida maka lei dehan nudar membru parlamentu kontinua tau atensaun ba asuntu seguransa interna no externa, maske mandatu ami-nia besik atu remata maibé ami nafatin rekomeda atu tau atensaun tanba kestaun defeza no seguransa ne’e hakerek ona iha konstituisaun”, dehan José.
Nia dehan, fasilidade ba forsa sira ne’e importante tebes, hanesan Prezidente Komisaun B konsidera katak Timor-Leste ba futuru sei tama ASEAN no adezaun ba ASEAN ida ne’e forsa armada Timor-Leste presiza dezenvolve aan.
“Ita presiza duni tau atensaun hodi dezenvolve ita-nia institusaun F-FDTL, hodi bele dignifika Timor-Leste iha nivél rejionál no internasionál”, katak nia.
Hatan ba preokupasaun ne’e, Ministru Defeza, Filomeno da Paixão de Jesus, hateten hanesan Ministru Defeza ne’ebé hetan fiar hosi VIII Governu Konstusionál sei esforsu, nune’e bele dezenvolve institusaun militár F-FDTL ba oin.
“Governu atuál konsege halo dokumentu lejislasaun haat ba F-FDTL liuliu oinsá atu moderniza liután F-FTL iha futuru. Dokumentu lejislasaun haat maka koseitu estratéjiku militár, sistema forsa, misaun F-FDTL no dispozitivu forsa”, esplika Filomeno da Paixão .
“Ho dokumentu lejislativu sira ne’e lori ita atu haree importánsia sira ba dezenvolvimentu ba instituisaun F-FDTL”, hateten nia.
Nia dehan, Governu komprometidu kontinua dezenvolve ita-nia forsa armada sai forsa ne’ebé modernu.
Jornalista: Natalino Costa
Editór : Zezito Silva
