DILI, 01 fevereiru 2023 (TATOLI) – Governu enserra konta bankária aberta iha tinan 2018, hamutuk ho Banku Sentrál Timor-Leste (BCTL, sigla portuges), titulada husi Autoridade Nasionál Petróleu no Minerál, relasiona ho projetu TL Cement, no transferénsia husi montante ne’ebé depozita iha konta ne’e ba iha konta Tezouru nian.
“Osan hamutuk millaun $50 ho ninia juru sira, osan ne’e dezde kriasaun iha 2018 to’o mai agora iha hela konta iha rai-li’ur. Agora, Konsellu Ministru delibera katak, haktuir rekomendasaun hosi Kámara Konta atu devolve hikas mai iha tezouru Estadu nian”, Ministru Prezidensia Konsellu Ministru, Fidélis Magalhães, informa iha Palásiu Governu.
Porta-voz ne’e argumenta katak osan ne’e Governu nian ne’ebé maka hola parte hosi akordu ida ne’ebé mak antes halo ho setór privadu katak sei iha kontribuisaun kontra partida ba iha dezenvolvimentu TL Cement ba inisiativa ne’ebé Ezekutivu aprova tiha ona antes.
“Governu ninia kontribuisaun ho montante millaun $50 rai iha konta ida ho banku ne’ebé ita fiar ho duni rating ne’ebé di’ak para bele kontribui ba iha ezekusaun implementasaun projetu ida ne’e, maibé hafoin hatuur osan ne’e iha ne’ebá dezde 2018 projetu seidauk la’o. Ho ida ne’e mak Governu hanoin katak rekomendasaun Kámara Konta nian osan ne’e tenke dada hikas”, nia afirma.
Kestiona katak projetu TL Cement sei kontinua ka la’e, governante ne’e esplika asuntu ne’e sei diskute hamutuk no Governu no sei forma grupu ida hodi halo análiza kle’an ba asuntu refere.
Akordu espesiál investimentu entre parte rua hala’o ona iha 17 maiu 2016, hafoin liuhosi Rezolusaun Governu n.u 41/2016, loron 23 novembru, aprova partisipasaun Estadu Timor-Leste iha sosiedade komersiál ne’e.
Iha loron hanesan, parte sira halo kontratu ida hodi aumenta kapitál no transforma sosiedade tuir kouta sai sosiedade anónima, hafoin kria konta bankária ne’ebé titulár hosi Autoridade Nasionál Petróleu no Minerál hodi garante fundu ba investimentu.
Notísia relevante : https://tatoli.tl/2021/12/29/governu-prolonga-kompartisipasaun-timor-leste-iha-akordu-investimentu-ho-tl-cement/
Jornalista: Antónia Gusmão
Editora: Maria Auxiliadora
