DILI, 01 fevereiru 2023 (TATOLI)—Sekretáriu Jerál Crus Vermelha Timor-Leste, (CVTL), Luis Pedro, hateten Organizasaun Internasionál ba Imigrasaun (IOM, sigla inglés) konkorda no fó apoiu rihun $200 ba CVTL atu implementa programa redusaun risku dezastre no prevensaun violénsia bazea ba jéneru.
Nia hatutan, fundu ida-ne’e sei implementa iha munisípiu haat hanesan Dili, Baucau, Covalima inklui Rejiaun Administrativa Espesial Oé-cusse Ambeno (RAEOA).
“IOM fiar CVTL atu hala’o programa redusaun risku dezastre ida-ne’e, ne’ebé foka liu ba prevensaun violénsia bazea ba jéneru no kapasita feto rurál sira iha jestaun risku dezastre naturál,” Luis Pedro hateten ba Agência Tatoli, iha salaun IOM, Caicoli, Dili, kuarta ne’e.
Nia hatutan, programa ida-ne’e sei foka liu ba hakbiit feto vulneravél sira no labarik sira-ne’ebé hela iha área risku dezastre munisípiu naturál sira.
“Ami hakbiit feto sira atu hetan koñesimentu barak liután kona-ba violénsia bazea ba jéneru no mós ajuda komunidade vulnerável sira atu hetan prémiu iha jestaun risku dezastre, ne’ebé kontribui ba redusaun risku dezastre naturál,” nia dehan.
CVTL mós sei hakbiit feto sira atu iha koñesimentu kona-ba atividade negósiu no mós atividade balun ne’ebé bele ajuda feto sira atu hadi’a sira-nia sustentabilidade moris.
CVTL sei fornese informasaun adekuadu kona-ba prevensaun violénsia bazea ba jéneru iha munisípiu haat no kobre suku 20-resin, hodi halibur komunidade vulnerável hamutuk 50.000 ne’ebé sei hetan benefísiu hosi programa ne’e.
Programa ida-ne’e sei implementa hosi CVTL durante fulan neen hahú hosi fevereiru to’o juñu 2023, no programa ne’e finansia hosi IOM ho valór fundu $200.000.
Tanba ne’e, nia husu ba komunidade ne’ebé hela iha área risku dezastre naturál nian atu alerta, klima ne’ebé mak impaktu hosi mudansa klimátika.
Komunidade hotu tenke iha koñesimentu sufisiente atu analiza temperatura klimátika tanba mudansa klimátika, ne’ebé sei la halo vítima barak liután mak hetan impaktu iha loron hirak tuir mai.
Jornalista : Osoria Marques
Editór : Cancio Ximenes
