Komunidade suku Triloka seidauk simu cesta bázika
BAUCAU, 01 fevereiru 2023 (TATOLI) – Komunidade iha suku Triloka, postu administrativu Baucau Vila, munisípiu Baucau seidauk simu cesta bazika tinan 2022 nian.
Xefe suku Triloka, Alexandre da Costa, rezeita informasaun kona-ba impedementu distribuisaun cesta bázika nune’e autoridade kontinua hein programa refere implementa hosi kompañia responsável.
“Ami seidauk simu, iha ona informasaun. Sira mai husu no ami hein bainhira to’o mai ita implementa,” Xefe suku Triloka hateten iha Lequeloiwatu, tersa ne’e.
Autoridade seidauk hatene naran kompañia implementadór maibé husu atu bainhira distribui hahaan bazea ba valór orsamentu no labele halo manipulasaun nune’e ajudu ne’ebé simu bele fasilita komunidade konsume iha uma-laran.
Alexandre da Costa informa, seidauk iha informasaun serteza kona-ba data atu distribusaun cesta bázika iha Triloka hafoin programa refere lansamentu iha munisípiu Baucau iha inísiu fulan-novembru.
Suku Triloka komposta hosi aldeia haat hanesan aldeia Aubaca, Baduho’o, Macada’e no Leciloiwatu ho totál populasaun 2.700.
Hosi númeru refere maihosi xefe família hamutuk 607 ne’ebé dadus kompleta ona hodi hein distribuisaun hosi kompañia responsável.
Jornalista : Natalino Belo
Editór : Evaristo Soares Martins
