MF sosializa sistema mudansa ezekusaun orsamentu iha Baucau
BAUCAU, 01 fevereiru 2023 (TATOLI) – Ministériu Finansa (MF) kuarta ne’e, sosializa autoridade munisípiu haat kona-bá mudansa sistema ezekusaun orsamentu jerál estadu (OJE) tinan-2023 iha munisípiu Baucau.
Diretór Jerál Interinu Planeamentu no Orsamentu hosi Ministériu Finansa, Salomão Ioaquim Menezes, esplika, mudansa sistema ezekusaun refere ligada ho lei Enkuadramentu Orsamentu Jerál Estadu no Jestaun Finanseira Públika (LEOGEGFP, sigla portugés), númeru 2/2022, dekretu-lei númeru 18 kona-ba programa orsamentál, dekretu lei númeru 19 kona-ba klasifikadór ekonómika inklui panorama orsamentál hosi tinan-2022-2023.
Notísia relevante: PN aprova proposta-lei enkuadramentu orsamentál iha finál global
“Ita agora hasoru hela ezekusaun orsamentu estadu iha kódigu foun barak, hanesan uluk klasifikasaun ekonómika kategoria lima maibé agora hamutuk 11 ne’ebé presiza hatuur tuir nia funsaun idak-idak. Sé lae implementadór sira bele halo sala ezekutasaun orsamentu,” Diretór Jerál Interinu Planeamentu no Orsamentu hosi Ministériu Finansa hateten iha Vila Nova, kuarta ne’e.
Nia akresenta, lei ne’e tuir situasaun realidade atuál iha lei orsamentu jestaun finanseiru la kondiz atu implementa tanba sistema ezekusaun iha mudansa tuir elementu funsaun idak-idak nian tanba antes ne’e akumaladu hamutuk maibé atuál fahé tuir klasifikasaun.
Mudansa sistema pagamentu hanesan saláriu vensimentu no viajen lokál inklui internasionál ba funsionáriu kontratadu, kazuál, termu sertu, asesór nasionál no internasionál sira. Uluk klasifikadu ba rúbrika bens servisu maibé atuál tenke selu hosi despeza pesoál tanba razaun orsamentu refere sei la devolve fila.
“Ami-nia prezensa to’o iha-ne’e hodi sosializa informasaun nesesáriu ba sira nune’e bele fasilita ezekuta orsamentu jerál estadu tinan-2023,” Salomão Menezes akresenta.
Dirijente MF konsidera sistema ezekusaun orsamentu importante atu ajente funsionáriu públiku iha munisípiu sira hatene tanba ezekuta mós orsamentu tinan-2023 nian.
Administradór munisípiu Viqueque, Januário Ximenes, konsidera sosializasaun lei enkuadramentu orsamentu importante tebes atu ajénsia estadu iha munisípiu sira hatene tanba iha mundansa ba sistema ezekusaun orsamentu iha tinan-2023.
“Fasilita tebes tanba uluk rúbrika sira labele muda maibé agora fó espasu hanesan nesesidade importante entre kategoria sira bela halo mudansa,” Januário Ximenes hateten.
Sosializasaun refere hala’o durante loron tolu, hahú tersa to’o kinta, 30 janeiru to’o 2 fevereiru, ne’ebé partisipa hosi autoridade admninistrasaun munisípiu Viqueque, Laútem, Manatuto inklui funsionáriu administrasaun Baucau, postu administrativu neen iha munisípiu.
Notísia relevante: Proposta-lei enkuadramentu orsamentál konsagra ho prinsípiu 11
Jornalista : Natalino Belo
Editór : Evaristo Soares Martins
