DILI, 01 fevereiru 2023 (TATOLI)—Sekretária Ezekutiva Programa Nasionál Dezenvolvimentu Suku, Claudinha Soares Pinto, hateten PNDS reabilitata ona sede suku iha territóriu nasionál 412.
“Programa ne’e ninia objetivu mak atu reabilita sentru suku 452. Ida-ne’e nu’udar pasu ki’ik ida hodi atinje. Maibé ami sei presiza kompleta tan suku 40,” Claudinha Soares Pinto hateten ba Agência Tatoli, foin daudaun ne’e.
Nia hatutan, tuir orientasaun hosi Ministru Administrasaun Estatál (MAE), Miguel de Carvalho, programa ne’e tenke ramata molok mandatu VIII Governu Konstitusionál ramata.
Reabilitasaun sede suku ne’e importante tebes, tanba liuhosi sede suku ne’e mak autoridade lokál sira bele atende ninia komunidade ho di’ak.
Ministru Administrasaun Estatál, Miguel dé Carvalho, hateten sede suku ne’e harii ona entre tinan 2005 to’o 2006, nune’e edifísiu sira-ne’e sai aat liután.
Rejime Jerál PNDS nian esplika iha Dekretu-Lei Nú. 08/2013, 26 junu, ne’ebé determina provizaun finanseiru jerál hosi programa ne’e.
Jornalista : Osoria Marques
Editór : Cancio Ximenes