STAE Oé-Cusse rejista eleitór foun 1.465 tuir votasaun iha eleisaun parlamentár
OÉ-CUSSE 01 fevereiru 2023 (TATOLI) – Sekretariadu Tékniku Administrasaun Eleitorál (STAE) iha Rejiaun Administrativa Espesiál Oé-Cusse Ambeno (RAEOA), daudaun ne’e rejista ona eleitór foun hamutuk 1.465 hodi ezerse direitu votu iha eleisaun parlamentár 2023.
“Hosi maiu to’o dezembru 2022, ita prodús ona kartaun eleitorál foun hamutuk 1.465. Dadus ne’e inklui mós resensiamentu eleitorál no atualizasaun, nune’e dadus resensiamentu eleitór tinan 2022 no atulizasaun baze dadus hamutuk 53.153, komposta hosi mane 27.407 no feto 26.106,” Diretora STAE Oé-Cusse, Luiza da Costa hatete iha Oé-Cusse, segunda.
Diretora ne’e informa, fatin sentru votasaun no estasaun votu sei aumenta, tanba antes ne’e sentru votasaun 60 no estasaun votasaun 88, maibé iha eleisaun parlamentár tinan ne’e sei iha mudansa tanba númeru eleitór aumenta.
“Durante ne’e ekipa tékniku kontinua halo identifikasaun, tanba sei iha mudansa, bazea dadus eleitór foun sira-ne’ebe rejista iha tinan 2022 nian, entaun ami aumenta tán sentru votasaun ba 80 estasaun votasaun 115, iha territóriu Oé-Cusse,” nia katak.
Tuir dadus Sekretariadu Tékniku Administrasaun Eleitorál (STAE) rejista ho totál eleitór provizória iha Oé-Cusse hamutuk 53.153, komposta hosi mane 27.407 no feto 26.106.
Jornalista : Abílio Elo Nini
Editór : Evaristo Soares Martins
