Agrikultura Baucau distribui fini hare tonelada 22

BAUCAU, 02 fevereiru 2023 (TATOLI) – Servisu munisipál agrikultura Baucau tinan ne’e distribui fini hare tipu nakroma tonelada 22 ba agrikultór sira iha postu admistrativu neen munisípiu Baucau.

Diretór servisu munisipál agrikultura Baucau, Moises Lobato Perreira, esplika, fini refere simu hosi Ministéiru Agrikultura no Peska (MAP) ne’ebé sei distribui ona agrikultór sira iha área irrigasaun Bulutu, postu administrativu Vemasse, Larisura iha postu Baguia, Sobabere Seiçal iha Baucau Vila ne’ebé kada área sei utiliza ektare 180.

“Ita sempre apoia komunidade ho fini kualidade tuir meta MAP nian atu hasa’e produsaun no asegura seguransa alimentár,” Diretór servisu munisipál agrikultura Baucau hateten iha vila Nova, kinta ne’e.

Hosi númeru refere distribui ba postu Baguia hamutuk tonelada 3.5, Vemasse 4.5, Venilale 3, Laga, 4, Quelicai 2.5, Baucau vila 4.5 ne’ebé sei kobre natar hamutuk ektare rihun-ida resin.

Nune’e prosesu distribusaun sei foka ba pakote agrikultura sira hanesan implementa métodu prátika agrikultura ho di’ak komposta hosi fila-rai, utiliza adubu orgánika, kuda liña, manutensaun, kolleta no armazenamentu.

“Kada ektare hamutuk kilograma 20 nune’e tonelada 22 sei kuda ba natar hamutuk ektare 1.100,” Moises Perreira akresenta.

Servisu agrikultura Baucau distribui mós adubu orgániku tipu tolu kompostu supernasa hamutuk tonelada 1.440, poknasa litru 960, ormónika litru 480 ne’ebé distribui ba área demonstrasaun hamutuk ektare 480 tanba sei halo de’it komparasaun entre utiliza adubu no ne’ebé la utiliza adubu.

Nune’e, Servisu Aarikultura Baucau finaliza ona distribusaun fini hare iha postu Laga, Quelicai no Venilale. Enkuantu Baguia, Baucau Vila no Vemasse tuir planu sei finaliza iha fulan-fevereiru.

Jornalista    : Natalino Belo

Editór           : Evaristo Soares Martins