DILI, 02 fevereiru 2023 (TATOLI) – Komandu FALINTIL-Forsa Defeza Timor-Leste (F-FDTL) entrega títulu onorífiku Bastaun Komandu ba Majór Jenerál Reformadu, atuál Primeiru-Ministru (PM), Taur Matan Ruak, ba Tenente-Jenerál Reformadu, Lere Anan Timur, no ba Brigadeiru Jenerál Reformadu, atuál Ministru Defeza, Filomeno de Jesus da Paixão.
Bastaun Komandu ne’e entrega hosi Xefe Estadu-Maiór-Jenerál F-FDTL, Tenente-Jenerál Falur Rate Laek, iha ámbitu aniversáriu Transformasaun FALINTIL ba FDTL ba dala-22, ne’ebé hala’o iha Kuartel Jenerál Fatuhada, kinta ne’e.
Iha serimónia entrega títulu onorífiku ne’e ba de’it Brigadeiru Jenerál Reformadu no Tenente-Jenerál Reformadu tanba Majór Jenerál, Taur Matan Ruak, lamarka prezensa iha eventu refere.
“Bastaun Komandu hanesan símbolu autoridade no reprezenta símbolu komandu, ne’ebé uza dezde tempu bei-ala sira, iha podér hodi komanda forsa iha terrenu. Liuhosi Bastaun Komandu, soldadu-sira hatene distingi sé mak komandu sira”, Tenente Jenerál Lere Anan Timur, hatete iha serimónia ne’e.
Bastaun Komandu mós nu’udar karaterístika forsa-armada ne’ebé uza hosi ofisiál jenerál sira iha funsaun komandu, liuhosi serbisu ne’ebé sira dedika ba iha FALINTIL-FDTL, ba abilidade komandu no lideransa durante períodu sira asume funsaun nu’udar Xefe-Estadu-Maiór Jenerál Forsa Armada-F-FDTL.
Lere Anan Timur orgullu ho inistiva Komandu F-FDTL hodi entrega títulu ne’e, maski Bastaun Komandu ne’e lahakerek iha estatutu militár.
“Laprevee iha estatutu F-FDTL nian, maibé Bastaun ne’e nu’udar símbolu komandu ninian, maski iha nasaun barak buat ne’e laiha, maibé ha’u ho ha’u-nian família orgullu”, nia dehan.
Lere sujere mós ba Komandu atu konsta iha estatutu militar, nune’e aban-bainrua sira tuirmai bele simu mós.
Jornalista: Antónia Gusmão
Editora: Maria Auxiliadora