COVALIMA, 02 fevreiru 2023 (TATOLI)–Governu liuhosi Ministériu Agrikultura no Peska (MAP), liuhosi projetu Hasa’e Produtividade Agrikultura Sustentavel (HAPAS) entrega hand tractor unidade 16 ba grupu agrikultura 16 iha aldeia Beilaku, suku Raimea, postu administrativu Zumalai, munisípiu Covalima.
Notísia Relevante: Governu distribui mákina dulas hare ba grupu agrikultura 10 iha Zumalai
“Ha’u husu ba ita-boot sira atu iha responsabilidade másimu, tenke kuidadu sasán sira-ne’ebé Governu entrega liu-hosi HAPAS tenke iha sentidu uza. Katak, sasán ne’e ha’u-nian, grupu sira organiza malu ba atu kuidade sasán sira-ne’e ho didi’ak no utiliza másimu hodi hasa’e produsaun,” Diretóra Jerál MAP, Maria Odete do Ceo Guterres, hateten iha nia diskursu iha serimónia entrega hand tractor ba grupu agrikultor 16 iha aldeia Beilaku, suku Raimea, postu Zumalai, munisípiu Covalima, kuarta ne’e.
Tanba ne’e, nia husu ba grupu agrikultura sira tenke iha vontade atu servidu hamutuk ho project Officer (PO) munisípiu Covalima, nune’e buat hotu bele la’o ho di’ak.
“Durante ne’e ami hirus project Officer tanba laiha lista no la iha relatóriu, maibé ha’u haree ho matan katak laiha kontribuisaun hosi ita-boot sira, ita-boot sira tenke kolabora ho PO iha Covalima,” nia dehan.
Reprezentante Administradór Covalima, Francisco Mendonça Tatamero, hato’o agradesimentu ba Governu liu-hosi Ministériu Agrikultura no Peska (MAP) ne’ebé sempre hanoin nia povu hodi entrega tratór ba grupu agrikultura sira.
“Agradese ba ita-nia VIII Governu Konstitusionál liu-hosi MAP ne’ebé la para, hahú hosi Governu dahuluk to’o ohin loron tratór ho hand tractor Governu sempre fahe. Ita mós agradese ba HAPAS nu’udar parseiru serbisu hamutuk hodi fornese materiál hanesan mákina hand tractor ba grupu benefisariu sira”, nia reforsa
Objetivu Governu oferese tratór ba komunidade atu hasa’e produtividade agrikutura, tanba bainhira temi dezenvolvimentu jerál ne’e, iha planu estratéjiku dezenvolvimentu nasionál (PEDN) no planu estratéjiku Dezenvolvimentu Munisípál.
Iha munisípiu halo ona elaborasaun ba Planu Estratéjiku Dezenvolvimentu Agrikutura Munísipál nomós iha vizaun no iha misaun, ne’ebé hala’o pilar haat (4) ba dezenvolvimentu hanesan pilar kapitál sosiál, kapital infraestrutura, kapital dezenvolvimentu ekonómiku no kapital dezenvolvimentu institusionál.
Ofisiál Projetu HAPAS Covalima, Leonito do Nasimento, hateten MAP liu-hosi projetu HAPAS entrega hand tractor hamutuk unidade 16 ba grupu agrikultura 16 iha suku Raimea, postu administrativu Zumalai, munisípiu Covalima.
“Ministériu Agrikultura no Peska liu-husi projetu HAPAS hamutuk ho ita-nia autoridade iha Covalima ho reprezentante MAP, ita halo distribuisaun hand tractor unidade 16 ba grupu benefisiáriu 16 iha suku Raimea, ne’ebé durante projetu HAPAS akompaña no halo prosesu ba sira-nia produsaun,” nia hateten.
Tuir dadus, hand tractor ne’ebé entrega ba grupu agrikultura 16 iha aldeia Loro ne’e simu hand tractor haat (4), aldeia Uma Klaran lima (5), aldeia Beilaku neen (6) no aldeia Oebaba ne’e simu hand tractor ida (1).
Benefisiáriu ne’ebé sei implementa atividade halo natar bazea ba hand tractor unidade 16 ne’e kada grupu ho nia benefisiáriu na’in-272 ne’ebé halo atividade halai natar ho luan área natar ne’e ektare 520 ne’ebé lokaliza iha Raimea.
HAPAS aprova fundu hamutuk $207,677.50 ne’e ba fundu ki’ik ne’e halai liu ba atividade halo natar nian no atividade kuda ai-oan iha teknolojia post kolleta, nune’e HAPAS sei sosa tan mákina rontok hare no ekipamentu seluk tanba planu sei sosa mákina rontok iha unidade 32.
Tuir planu, sei entrega mákina rontok ba grupu agrikultura hare hamutuk ekipamentu seluk ho orsamentu ne’ebé aprova no iha ona konta bankaria munisípiu Covalima hamutuk $33,600.00 ne’e hein atu halo ezekusaun.
Tratór unidade 16 ne’ebé entrega ne’e kada tratór ho nia presu $2.400,00 ne’e, inklui kompañia fornesedór transporta mai to’o ba grupu ida-idak nia fatin, tanba ne’e hand tractor unidade 16 ho nia presu hamutuk $38.400,00.
Hafoin entrega hand tractor unidade 16 ba grupu agrikultura sira, HAPAS mós entrega gazoel ka solar ho litru 8.160 ba membru grupu sira.
Jornalista : Celestina Teles
Editór : Cancio Ximenes
