DILI, 02 fevereiru 2023 (TATOLI) – Komandu FALINTIL-Forsa Defeza Timor-Leste (F-FDTL) halo promosaun diviza ba membru 21, iha ámbitu aniversáriu Transformasaun FALINTIL ba FDTL ba dala-22.
Serimónia promosaun ne’e asiste direita hosi Prezidente Repúblika (PR), José Ramos Horta, no entidade Estadu sira seluk, iha Kuartel Jenerál Fatuhada, kinta ne’e.
Promosaun ne’e husi Postu Tenente Koronél ka Kapitaun Fragata ba Postu Kapitaun-Már-e-Guerra be ema na’in-neen. Postu Majór ka Kapitaun Tenente promove ba Postu Tenente Koronél Graduadu ka Kapitaun Fragata na’in-rua. Postu Tenente ka Segundu-Tenente promove ba Kapitaun ka Primeiru-Tenente ba ema na’in-hitu.
Nune’e mós Postu Sarjentu Xefe promove ba Postu Alferis hamutuk na’in-ida, Postu Primeiru-Sarjentu promove ba Postu Alferis na’in-ida, Postu Sarjentu Xefe promove ba Postu Sarjentu Mor na’in-ida no Postu Sarjentu-ajudante promove ba Sarjentu-Xefe na’in-tolu.
Xefe Estadu hato’o votu parabens ba membru sira hotu ne’ebé hetan promosaun no hola parte prosesu profisionalizasaun, tranzisaun hosi komandu 1975 tempu luta armada ho neineik ba jerasaun foun.
“Istória rua, istória antigu no istóriu foun ita hakerek daudaun ona ne’e. Ba sira hothotu ne’ebé hetan promosaun, hakarak hato’o parabens mós ba komandu tomak ne’ebé organiza prosesu tranzisaun sira ne’e hosi jerasaun 1975 mai jerasaun foun forsa armada nian”, Horta kongratula.
Xefe-Estadu-Maiór Jenerál F-FDTL, Tenente-Jenerál Falur Rate Laek, husu promovidu sira atu kontinua presta serbisu di’ak hodi serbí Estadu no povu.
“Promosaun diviza ne’e hola parte iha dezenvolvimentu karreira militár idaidak nian, nune’e ba oin bele dezenvolve di’ak liután instituisaun F-FDTL”, Falur espera.
Notísia relevante: Prezidente Repúblika prefere kualidade iha F-FDTL
Jornalista: Antónia Gusmão
Editora: Maria Auxiliadora
