COVALIMA, 02 fevreiru 2023 (TATOLI)–Ministru Administrasaun Estatál (MAE), Miguel Pereira de Carvalho, husu ba xefe suku no xefe aldeia sira atu promove pás no estabilidade iha suku no aldeia hodi hasoru eleisaun parlamentar 2023.
“Ha’u husu ita-boot sira mantein estabilidade garante trankuilidade hakmetek iha imi-nia aldeia no suku ida-idak. Ha’u apela ba xefe suku no xefe aldeia sira atu promove pás tanba ita tenke husik liberdade ba ita-nia populasaun sira atu determina iha eleisaun ne’e,” Miguel Pereira de Carvalho apela liuhusi diskursu bainhira partisipa serimónia distribuisaun zinku, iha resintu AMC, kinta ne’e.
Ho nune’e. nia dehan, povu mak haree governasaun sira-nia servisu no sei depozita konfiansa., se bainhira governasaun balun ladi’ak husik povu mak deterimana.
“Ita-nia povu haree Governu halo-buat di’ak nia sei depozita konfiansa ba. Bainhira ida fali halo la di’ak, ha’u lakohi hakarak ida seluk husik populasaun mak determina maibé ida-ne’e konxiénsia mai-hosi ita-boot sira hotu, partidu polítiku (Parpol) ida-nia governasaun no nia Governu ba ema hotu,” nia dehan.
Nia apela ba sidadaun hotu halo esforsu iha suku no aldeia hodi garante estabilidade iha imi-nia hela fatin, tanba eleisaun nia objetivu mak povu sira atu hili sé mak merese atu sai deputadu iha parlamentu Nasionál (PN) no sai merese lidera governasaun, povu mak deside ida-ne’e.
“Labele iha tentativa sira haforsa ita-nia populasaun sira hodi vota ba partidu ida-ne’e ka ida ne’eba uza programa ita nia uza kampaña partidu. Esforsu ita-nia populasaun vota ho konsiente hili sé. Tanba populasaun hili determina futuru rai ida-ne’e ba tinan lima mai. Importante ita labele kari rai-rahun iha populasaun sira-nia matan. Servi ita-nia intrese iha governasaun ida ita-nia populasaun bele arrepende. Tanba defaktu arrepende ita lakohi hanesan governante VIII Governu konstituisional ida-ne’e labele akontese,” nia informa.
VIII Governu Konstituisionál nia inisiu mandatu iha 2018, Governu ida-ne’e rezultadu mai hosi eleisaun antesipada hakfodak kompleta tinan lima (5), tanba la kle’ur hakbesik ba eleisaun parlametar.
“Governasaun ne’ebé lidera hosi Primeiru-Ministru, Taur Matan Ruak, nia dezenvolmentu mak ema sira tanba ita-sira tuur iha ne’e benefisia ba programa hosi governasaun ida-ne’e. La kle’ur tan ita sei hakat ba eleisaun parlamentár, eleisaun tuir ita-nia konstituisaun RDTL. Maibé Prezidente Repúblika (PR) mak sei dekreta eleisaun bele iha maiu ka juñu bele mós iha agostu ida-ne’e kompeténsia PR nian,” nia dehan.
Jornalista : Celestina Teles
Editór : Cancio Ximenes
