DILI, 02 fevereiru 2023 (TATOLI) —Xefe Departamentu Asisténsia Urbana iha Ministéiru Administrsaun Estatál (MAE), Abel Bere, hateten iha tinan 2022 ne’e Dirasaun Nasionál Organizasaun Urbana (DNOU) kontribui reseita hosi fonte estasionamentu iha Dili laran hamutuk $31.998.05 ba kofre Estadu.
“Ba fulan-janeiru ne’e ita seidauk simu relatóriu hosi munisípiu Dili, kona-ba estasionamentu maibé ba tinan kotuk nian mak ita hetan reseita hosi estasionamentu hamutuk $31.998.05 no ita kontribui na kofre Estadu,” nia dehan ba Agência Tatoli iha nia kna’ar fatin Colmera, kinta ne’e.
Nia hatutan, hosi númeru osan ne’e foin mak rekolla hosi estasionamentu Merkadu Taibesi, Avenida 20 de Maio, Avenida Liberdade Imprensa no Zona Colmera nian.
“Ita foin mak estasionamentu ida-ne’e de’it entaun presiza atu alarga tan iha Dili, tanba iha fatin barak mak seidauk estabelese inklui estabelese mós iha munisípiu sira maibé buat hotu presiza osan mak foin bele realiza,” nia dehan.
Problema ida mak pesoál kobransa ka ema ne’ebé mak hein estasionamentu sira menus, nune’e iha fatin balun dala ruma defisil atu kontrola maibé ida-ne’e kompeténsia Prezidente Autoridade Munisípiu Dili nian.
Kritériu selu transporte ne’ebé mak para iha estasionamentu mak motór sentavu 0,10, karreta kiik sentavu 0,25, kamioneta selu sentavu 0,50 no Tronton ne’e seluk sentavu 0,75 kada sira para iha estasionamentu sira iha Dili.
Estasionamentu hahú estabelese iha kapitál Dili iha tinan 2017 to’o agora hatama reseita hamutuk $165.649.70, tinan 2017 iha $8.844.80, tinan 2018 iha $27.702.60, tinan 2019 iha $27.594.45, tinan 2020 iha $41.792.00, tinan 2021 iha $27.717.80 no tinan 2022 iha $31.998.05.
Dekretu-lei Nú 3/2017, 22 de março, regime das zonas de estacionmento de duração limitada.
Jornlista : Osória Marques
Editór : Cancio Ximenes
