VIQUEQUE, 02 fevereiru 2023 (TATOLI)- Xefe suku Maluro, Postu Adiministrativu Viqueque-vila, munisípiu Viqueque, Francisco Amaral, informa, progresu kontrusaun fizíku “Uma Naroman ba Povu (UNP)” ba benifisiáriu ka uma-kain na’in-10 iha suku Maluro atinje 25%.
“Kona-ba konstrusaun Uma Naroman ba Povu iha suku Maluro liuliu iha área dezignadu projetu Planta LNG, ami muda sai iha área ne’ebé la afetadu, nune’e daudaun konstrusaun fíziku atinje ona 25%”, Francisco Amaral, hateten ba Agência Tatoli, iha sede suku Maluro, kinta ne’e.
Nia dehan konstrusaun 25%, tanba UNP unidade 10 ne’e, daudaun badaen sira hahú finaliza ona pondasi no kontinua halo sinta no balun hada ona batako.
Nia afirma, fatin ne’ebé daudaun konstrui UNP ba ne’e komunidade sira ka benifísiáriu sira simu no prontu ba hela bainhira finaliza konstrusaun.
Antes ne’e, Ministru Adiministrasaun Estatál (MAE) rasik maka ko’alia atu labele halo tan uma iha área dezignadu Beaço. Nune’e ba implementasaun UNP regular deside halo iha área sira-ne’ebé mak la’ós afetadu ba projetu planta LNG.
Benefisiáriu UNP iha suku Maluro hosi aldeia rua hanesan aldeia Lo-Oan ho uma-kain lima no Macalosa uma-kain lima . Konstrusaun uma lima iha parte Abat no uma lima konstrui iha área Koru.
Konstrusaun UNP ne’e ho tipu 61, unidade haat ho medida 7,5×7, kompostu uma haat, kuartu tolu, kada uma ida kustu $17.000. Nune’e ba uma 10 hamutuk $68.000.00.
Enkuantu konstrusaun uma tipu 54 medida 7,5×6 mak kuartu rua, hanesan uma neen, kada uma ida gastu $16, 014. 00, alokasaun ba uma neen totál gastu $96.084, alokasaun orsamentu ba uma 10 totál orsamentu hamutuk $164. 084.
Jornalista: Vitorino Lopes da Costa
Editór : Florencio Miranda Ximenes
