Singapura sei ajuda TL atu hetan esperiénsia hodi adere permantente ba ASEAN
DILI, 02 fevereiru 2023 (TATOLI) – Singapura sei apoiu Timor-Leste atu hetan esperiénsia no aspeitu nesesáriu sira atu kontribui kontribui ba nasaun ne’e nia adezaun ba ASEAN.
“Hanesan ita hotu hatene katak Road Map dezenvolve ona hosi ASEAN hodi dezeña kritéria no timeline ba Timor-Leste ninia adezaun ba ASEAN no ami haree ba oin atu ajuda Timor-Leste atu hetan esperénsia no aspeitu nesesáriu sira hodi kontribui ba Timor-Leste bele hola parte kompletamente hodi sai hanesan membru permanente ASEAN”, Robin Hu Yee Cheng, dehan hafoin hasoru malu ho Primeiru-Ministru Taur Matan Ruak, iha Palásiu Governu Dili, ohin.
Nia rekorda, Timor-Leste atu tama ba membru ASEAN to’o ona iha nível konsensu ne’ebé mak anunsia´ona iha Kamboja tinan kotuk.
“Ha’u espera katak Timor-Leste nia esforsu sei priénse kritéria ne’ebé estabelese ona iha Road Map nune’e ba oin ami hakarak haree Timor-Leste ninia adezaun nudar membru ASEAN”, adianta nia.
Aleinde ne’e embaxadór ho xefe governu koalia mós kona-ba dezenvolvimentu Timor-Leste nian.
“Primeiru-Ministru ho ha’u halo diskusaun ne’ebé di’ak, ida ne’e hanesan ha’u nia visita dahuluk, mai Timor-Leste no ha’u hanesan embaixadór foun hosi Singupura mai iha ne’e, entaun ami diskute kona-ba kontribuisaun pasadu sira ne’ebé mak Singapura kontribui ba Timor-Leste nia independénsia, dezde Timor-Leste restaura nia independénsia ami haruka ona militár no Polísia liu rihun resin mai iha ne’e hodi suporta servisu peace keeping force husi UN”, haktuir nia.
Nia revela, durante tinan 20 Singapura sempre ajuda Timor-Leste iha área formasaun ba funsionáriu públiku, kria programa hodi suporta funsionáriu públiku iha Governu liuliu iha preparasaun servisu ba Timor-Leste nia adezaun ba ASEAN.
Jornalista: Hortencio Sanchez
Editór : Zezito Silva
