DILI, 02 fevereiru 2023 (TATOLI) – Diretora Ezekutiva Fundasaun Alola Maria Imaculada Guterres, dehan susu-been inan mak aihan importante ba labarik nia kresimentu. Tanba ne’e nafatin prátika fó susu-been eskluziva ba bebé foin moris to’o tinan rua.
“Inan sira nafatin prátika fó susu-been eskluziva ba bebé foin moris to’o fulan neen, depois kontinua fó susu to’o tinan rua, tanba susu-been inan mak aihan ideal ne’ebé importante tebes ba labarik sira nia kresimentu no dezenvolvimentu saudável”, Maria Imaculada Guterres, informa iha nia kna’ar fatin Mascarinhas, ohin.
Nia dehan, família uma-laran liuliu banin feto, ka avo feto sira tenke suporta bebé nia inan atu fó susu-been eskluziva atu fó susu ho susesu.
“Ami nafatin fó sosializasaun ba komunidade hotuhotu liuliu lider lokál sira, atu ajuda fó informasaun ba komunidade sira ne’ebé iha área remota, atu hatene liu kona-ba fó susu-been eskluziva ba bebé sira foin moris mai”, afirma nia.
Nia dehan, se inan ida lakohi fó susu been eskluziva maibé sira hili liu formula, entaun sei iha risku ba bebé iha futuru, bele hetan moras hanesan tensaun alta, estruk, diabetes no moras sira seluk tan.
Tanba ne’e, iha 25 janeiru 2023, Governu liuhosi Konsellu Ministru aprova ona projetu dekretu lei ne’ebé aprezenta husi Ministra Saúde, Odete Maria Freitas Belo, kona-ba rejime jurídiku substitutu susu-been inan nian.
Diploma ida ne’e ho nia objetivu atu regula komersializasaun informasaun publisidade no kontrolu ba kualidade produtu sira ne’ebé mak destina direta ka indireta ba alimentasaun ba bebé sira ne’ebé sei susu.
Jornalista : Felicidade Ximenes
Editór : Zezito Silva
