DILI, 03 fevereiru 2023 (TATOLI) – Diretór Ezekutivu Aliansa Nasionál Kontrolu Tabaku iha Timor leste, Sancho Belito Fernandes, hateten Aliansa Nasionál Kontrolu Tabaku (ANCT-TL) halo ona sosializasaun embalajen foun ba populasaun sira iha Munisípiu Dili, Manatutu no Ermera.
“Ami dezenvolve peskiza ho embalajen foun hodi hetan amostra 1.005 iha munsípiu tolu atu nune’e sira bele tauk labele fuma”, Sancho Belito Fernandes informa ba TATOLI.
Nia dehan, ida ne’e kontinuasaun husi efetividade embalajen anteriór sira ne’ebé la efetivu , hanesan impoténsia, fuma oho ita no moras fuan.
“Ami hatudu embalajen foun ho nia figura kedas, hanesan pulmaun metan no kankru kakorok ne’e ba populasaun sira tanba sira tauk, entaun rezultadu efetivu tebes, ho ida ne’e ami sei oferese ba Ministériu Saúde atu sira muda ida ne’e tanba sira mak poder no iha kompeténsia”, nia deklara.
Sancho Fernandes afirma, iha fulan marsu sei publika relatóriu ne’e ba públiku tanba peskiza ne’e rasik la’o ho di’ak.
Tanba ne’e, Ministériu Saúde tenke halo mudansa ba figura sira antes atu populasaun sira bele redúz fuma iha komunidade nia leet no bele redúz moras hadaet iha Timor Leste.
Sancho husu populasaun liuliu inan no aman, juventude sira hotu katak tabaku ne’e la di’ak no estraga ema nia saúde, tanba ne’e prevene ou hapara fuma iha sosiedade nia leet.
Jornalista : Felicidade Ximenes
Editór : Zezito Silva
