DILI, 03 fevereiru 2023 (TATOLI)—Prezidente Repúblika (PR), José Ramos Horta, kinta (02/02) ne’e, partisipa iha serimónia lansamentu Konsuladu Suísa no Alemaña iha Timor-Leste ne’ebé realiza iha Embaixada Portugál iha Dili.
PR Horta hateten, serimónia ne’e interresante ne’ebé organiza hosi Embaixadora Suísa no Alemaña iha Jakarta, iha ne’ebé sira nomea sidadaun estranjeira rua, nu’udar Konsul Onorária Alemaña no Konsul Suísa.
Nune’e iha abertura Konsuladu nasaun Europeia rua ne’e, Xefe Estadu fiar katak sei fortalese relasaun entre Timor-Leste ho Alemaña no Suísa.
‘’Ho ida-ne’e, ha’u fiar katak ita-nia relasaun ho nasaun rua ne’e inklui Alemaña ne’ebé sei hahú fila-fali ho forsa, ha’u koñese ema lubuk ida, balun mai Timor ona. Ho deputadu hosi Alemaña sira mai iha ne’e iha outubru liubá, nune’e iha esperansa katak sei hahú fila-fali relasaun ne’e hamutuk ho rai sira selu,k” Xefe Estadu hateten liu nota imprensa ne’ebé Agência TATOLI asesu, sesta ne’e.
Konsúl Onorária dezignada iha Timor-Leste hosi Suísa mak Mónica Mendes da Silva no Lena Lenzen hosi Alemaña
Dezde fulan maiu tinan 2022, Prezidente Repúblika José Ramos Horta, aposta ba reforsu kooperasaun ho nasaun seluk, liu-hosi vizita bá Indonézia, Austrália, Singapura, Malázia, Kambódia, Estadu Unidu Amérika no Brazíl no mós partisipa iha eventu ne’ebé organiza hosi embaixada sira iha Díli no ajénsia Internasionál sira.
Iha tersa (31 janeiru) liu ba, Embaixadór rezidente no naun rezidente hosi nasaun 11 entrega karta krendensiál ba Prezidente Repúblika, hodi hametin kooperasaun ho Timor-Leste iha setór oioin.
Jornalista : Nelson de Sousa
Editór : Cancio Ximenes
