DILI, 03 fevereiru 2023 (TATOLI)— Sekretáriu Estadu Peska, Elídio de Araújo, hateten, Ministériu Agrikultura no Peska (MAP) daudaun ne’e halo ona programa tara bandu hodi proteje ba biodiversidade tasi nian.
“Ko’alia kona-ba asegura biodiversidade tasi nian ita iha ona programa hanesan tara bandu iha fatin lubuk ita bolu naran área marrina protejida, ho objetivu oinsá ita atu proteje ita-nia biodiversidade iha tasi-laran,” Elídio de Araújo dehan ba Ajénsia Tatoli, iha nia knaar-fatin, MAP Comoro, Dili, sesta ne’e.
Nia dehan, programa tara bandu área protejida marrina ne’e rasik, hala’o ona iha munisípiu Ataúro, Liquiça, Bobonaro Batugade no Manufahi-Same.
“Munisípiu sira seluk ne’ebé seidauk ita mós iha ona planu atu alerta tan atu ita-nia komunidade labele estraga biodiversidade tasi hanesan ahu-ruin no animal tasi,” nia dehan.
Nia dehan, liuhosi tara bandu husu públiku labele estraga ahu ruin sira. Tanba ahu ruin sira ne’e nu’udar fatin subar ba ikan sira iha tasi laran.
“Ita hotu hatene ahu ruin mak sai fatin protejida ba ikan sira liuliu bainhira ikan atu tolun nune’e ita tenke kuidadu labele foti ahu ruin sira ne’e,” Elídio dehan.
Jornalista : Arminda Fonseca
Editora : Armandina Moniz
