PNTL rejista nain rua lakon vida hosi númeru asidente tráfegu 66 iha janeiru
DILI, 03 fevereiru 2023 (TATOLI) – Komandante Tránzitu Munisípiu Dili, Inspetór Polísia, Domingos Sarmento Gama, informa Komandu Polísia Nasionál Timor-Leste (PNTL) liuhosi Sesaun Tránzitu, rejista kazu asidente tráfegu 66, rua lakon vida iha janeiru.
“Fulan janeiru nian-laran, ita rejista kazu asidente tráfegu hamutuk 66, hosi númeru ne’e 22 kanek grave no kanek kaman ema-nain 42 no mate ema nain rua”, Inspetór Polísia, Domigos Gama, hateten ba jornalista sira iha Komandu PNTL Munisípiu Dili, Caicoli, Sesta ne’e.
Nia dehan, ba sira ne’ebé mak hetan asidente tráfegu rezulta mate no kanek, tenke prosesu tuir dalan legál, tanba lakon ema nia vida no hakanek ema nia-isin.
“Sira ne’ebé kanek todan no kazu fatál sira, parte rua bele apoiu malu hanesan apoiu materiál no finanseira, maibé la signifika sira hetan akordu atu rezolve, maibé prosesu ne’e kontinua to’o iha Ministériu Públiku (MP) no to’o iha tribunal”, nia konklui.
Jornalista: Natalino Costa
Editór : Zezito Silva
