COVALIMA, 03 fevreiru 2023 (TATOLI)–Ministru Administrasaun Estatál (MAE), Miguel Pereira de Carvalho, hateten populasaun Timor-Leste nia uma 200.000 ninia kondisaun seidauk di’ak.
“Ita-nia populasaun agora matenek hanesan ko’alia ami hetan ona uma, maibé ami nia viziñu sira seidauk hetan. Ha’u uluk Sekretária Ezekutiva (PNDS) bainhira inaugura uma PNDS, ita rona populasaun ko’alia hanesan ne’e, ita fila lori naha todan ho razaun Tmor laran tomak ne’e, populasaun nia uma kuaze rihun 200 mak nia kondisaun seidauk di’ak, inklui ita-boot sira hotu parese xefe suku di’ak hotu ona,” Miguel Pereira de Carvalho hateten liuhosi diskursu iha AMC, Sukaer Laran, kinta ne’e.
Hosi uma rihun 200 ne’ebé kondisaun seidauk di’ak, hanesan Ministru Administrasaun Estatál (MAE) iha governasaun ida-ne’e preokupa tebes ho populasaun nia halerik.
“Ita-nia populasaun sira-nia halereik hanesan ne’e, ita preokupa tanba ita ukun rasik an tinan 20, ita-nia populasuan barak mak hela iha uma no fatin ladiak ne’e kondisaun ida ita la espera, ita hanoin para ukun rasik an,” nia hateten.
VIII Ggovernu Konstituisionál konstrui ona Uma Naroman ba Povu (UNP) durante tinan rua ikus konstrui uma 300-resin hanesan iha Covalima no tinan-ne’e Governu sentrál sei aloka ba imi minimu uma 250 ba Covalima.
Tanba ne’e, nia dehan, xefe suku sira balun hetan uma sia (9) no 10 ba sira-ne’ebé aldeia rua de’it parese uma neen (6), maibé sira-ne’ebé aldeia barak ne’e bele hetan aldeia ida, -uma 15 to’o 20.
“Depois PNDS Covalima sei informa ba ita-boot sira tau hamutuk númeru sira-ne’e iha Timor laran tomak uma foin mak 11.000. Ohin, ha’u temi rihun 200 ne’ebé seidauk di’ak entaun Governu nia mandatu bainhira ramata foin konstrui rihun 11,000 de’it. Ha’u espera sei falta rihun 190, Governu tuir mai presiza halo esforsu para bele kontinua,” nia dehan.
Alende ne’e, governante ne’e relata dadus kondisaun uma iha Timor-Leste, nia mós relata dadus timoroan ne’ebé sei ki’ak ne’e iha 42% no labarik sira má nutrisuan ne’e iha 49%.
“Ha’u hakarak hatete ba ita-boot sira 42% timoroan ohin loron sei ki’ak, 58% mak iha ki’ak nia leten labarik sira krekas 49% labarik sira-ne’ebe tinan lima maibé sei badak hela ne’e kuaze 44%, númeru ida-ne’ebé boot tebes. Entaun situasaun rai Timor-Leste ohin loron seidauk di’ak, importante populasaun sira hotu atu hamutuk fó liman ba malu servisu dezenvolve ita-nia rai hodi hadi’a ita-nia populasaun nia moris,” nia hateten.
Jornalista : Celestina Teles
Editór : Cancio Ximenes
