DILI, 03 fevereiru 2023 (TATOLI)—Prezidente Repúblika (PR), José Ramos Horta, hasoru malu ho Komandante Indo-Pasífiku Estadu Unidu Amérika (EUA), Almirante John C. Aquilino, hodi diskute reforsu kooperasaun entre nasaun rua.
Exérsitu Estadu Unidu Amérika hakarak hametin kooperasaun iha setór saúde, seguransa, apoiu ba F-FDTL no reabilitasaun konjunta aeroportu Baucau.
“Estadu Unidu Amérika mantein kooperasaun seguransa iha tempu naruk ho Timor-Leste. Ita hala’o ezersísiu militár konjuntu sira, promove ba oin dezenvolvimentu no formasaun profisionál sira no reforsa asisténsia umanitária. Ha’u hein ba oin hakle’an liután ita-nia kooperasaun, bazea ba ita-nia valór demokrátiku no interrese komún sira iha rejiaun Indo-Pásifiku ida-ne’ebé nakloke no livre,” Almirante Jhon Aquilino hateten hafoin hasoru malu ho Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, sesta ne’e.
Prezensa Almirante Jhon Aquilino iha Timor-Leste, atu partisipa aniversáriu F-FDTL, entrega unidade kuidadu intensiva movél iha Ospitál Nasionál Guido Valadares (HNGV) ne’ebé hetan finansiamentu hosi Ajénsia USAID ho orsamentu $2.3 hodi kria ekipamentu moderna, hodi garante kualidade prestasaun serbisu saúde.
Partisipa mós iha asinatura programa parseria estaduál atu haforsa dezenvolvimentu profisionál, formasaun no interkámbiu sira entre F-FDTL no Guarda Nasionál Rhode Island no estabelese kooperasaun entre Timor-Leste no Rhode Island iha setór governasaun, seguransa, ekonomia no sosiál.
Jornalista : Nelson de Sousa
Editór : Cancio Ximenes
