Prezidénsia Repúblika-CARE asina akordu hadi’a edukasaun infantil-nutrisaun labarik
DILI, 03 fevereiru 2023 (TATOLI)—Prezidénsia Repúblika ho CARE Internasionál, sesta ne’e, asina akordu hodi estabelese parseria liuhosi asina akordu hodi haforsa kompromisu atu atinje prioridade dezenvolvimentu xave sira.
Nia hateten, ida-ne’e refleta ba prioridade mútua mak gabinete Prezidente Repúblika no CARE Internasionál estabelese parseria ida ho objetivu atu hadi’a edukasaun infantil, nutrisaun labarik no feto nia estatutu ekonomia iha área rurál.
“Ekipa CARE Internasionál orgullu tebes atu komete ba ohin loron no haforsa tan ita-nia esforsu atu kontribui no realiza Prezidente nia prioridade sira. Ami hein atu halo luan ita-nia serbisu hamutuk atu hadi’a estatutu feto no labarik feto nian iha edukasaun, saúde no ekonomia iha área hirak ne’ebé iha área remota liu iha rai-laran,” Diretór CARE Internasionál, Peter Goodfellow, hateten ba jornalista sira hafoin asina akordu iha Palásiu Prezidensiál Nicolau Lobato, Bairru Pite, sesta ne’e.
Parseria ida-ne’e dezenvolve ona atu responde ba Prezidente Repúblika nia komprimisiu atu halo mudansa iha área hirak ne’e no hametin liután ho CARE Internasionál nia esperiensia no kapabilidade atu lori programa sira foka ba kualidade edukasaun, saúde no igualdade jeneru ho eskala boot.
Iha Timor-Leste, CARE Internasionál koñesidu ho ninia apoiu ba setór edukasaun, partikularmente atu hadi’a literasia, numerasia no kualidade hanorin.
CARE Internasioná; n ia kna’ar ida mak hadi’a nutrisaun liuhosi promove prátika dieta saudavél ba hanorin eskola primaria sira liuhosi programa sira hanesan Lafaek Learning, mídia no programa edukasaun, no nutrisaun hatutan feto nia empoderamentu ekonomia sai sentru ba CARE nia programa sira.
Nia dehan, ida-ne’e atinje liuhosi responde ba imbalansu poder iha uma laran no komunidade nia leet, haforsa asesu ba formasaun hadi’a abilidade téknika no dezenvolve konxiénsia di ak ba merkadu.
Parseria ida-ne’e sei validu ba tinan rua no sei ajuda halo luan tan inisiativa dezenvolvimentu sira-ne ebé eziste ona no hirak ne ebé iha futuru iha área rurál.
Ida-ne’e inklui atividade espesifiku, prátika no komplementáriu hanesan promosaun atu enkoraja lee iha uma, promosaun tein hahan nutritivu no apoiu feto sira-nia lideransa no foti desizaun iha nivel suku.
Xefe Kaza Sívil Prezidénsia Repúblika, Bendito Freitas, hateten atvidade ne’e importante tebes atu refleta partisipasaun Prezidénsia Repúblika ho CARE Internasionál, Prezidénsia Repúblika tanba mandatu Prezidensiál atu refleta prióridade sira ba programa ne’ebé Prezidente Repúblika kuidadu tebes mak edukasaun, saúde, nutrisaun no mós empoderamentu ekonómiku feto nian.
“Tanba ne’e, ohin reprezentante CARE Internasionál iha ne’e, atu bele promove asina memorandu ida-ne’e hodi serbisu hamutuk períodu tinan rua, iha área sira-ne’ebé importante liu-liu edukasaun kiik-oan sira atu bele promove,” nia hateten.
Iha Timor-Leste, área ne’ebé mapa intervensaun CARE Internasionál nian mak prodús kualidade ida di’ak no hatudu diferensa katak estudante sira-ne’ebé prátika leitura ba revista Lafaek kiik ho jornál sira hatudu kualidade di’ak iha rezultadu sira-nia leitura ida-ne’e importante tebes.
“Hosi parte ita-nia serbisu hamutuk atu bele parseira ne’e la’o di’ak liután no promove edukasaun, saúde no mós empoderamentu feto nian,” nia hateten.
Jornalista : Nelson de Sousa
Editór : Cancio Ximenes
