DILI, 04 fevereiru 2023 (TATOLI)—Eletrisidade de Timor-Leste Empreza Públika (EDTL, E.P) liuhosi Divizaun Rekursu Umanu, semana ne’e, asina kontratu servisu ho funsionáriu foun hamutuk 74.
Bazea ba nota komunikadu ne’ebé Agência Tatoli asesu sábadu ne’e, funsionáriu na’in-74 ne’ebé hetan kontratu ho EDTL, E.P ne’e selesionadu iha prosesu rekrutamentu ba pozisaun asistente tékniku liña distribuisaun ho númeru referénsia PTC/048EDTL, E.P/2022.
Komisáriu Ezekutivu Servisu Tékniku EDTL, E.P, Latino Jerónimo husu ba tékniku selesionadu sira atu servisu ho profisionál, servisu ho seguru no responsabilidade nune’e bele hadi’ak liutan kualidade fornesimentu enerjia elétrika ba kliente sira.
“Parabéns ba ita-boot sira-ne’ebé selesionadu iha prosesu ida-ne’e, husu ba imi hotu servisu ne’ebé imi sei halo ne’e servisu tékniku no risku tanba ne’e aplika imi-nia profesionalizmu, uza ekipamentu protesaun individuál (PPI) no importante liu mak tenke servisu ho ekipa,” Latino Jerónimo hateten.
Komisáriu Ezekutivu ne’e husu ba funsionáriu sira tenke servisu ho dixiplina no ekipa tanba EDTL, E.P proibi makaas no la tolera funsionáriu sira-ne’ebé aplika diferensia grupu sira, hanesan arte marsiál no rituál partidária no seluk tan, liu-liu komete aktu krime sira hanesan halo violasaun diretu umanu, asédiu seksuál no krime sira seluk.
“Bainhira ida-ne’e akontese mak EDTL, E.P sei hakotu imi-nia kontratu servisu no prosesa tuir lei Timor-Leste nian,” nia dehan.
Tékniku 74 ne’ebé hetan kontratu hosi EDTL, E.P ne’e sei destaka iha postu administrativu sira hanesan postu administrativu Laclo, Laclubar, Natarbora no Soibada munisípiu Manatuto nian, ba munisípiu Dili mak Metinaro.
Nune’e postu administrativu Bobonaro, Lolotoe, Cailaco, Balibo no Atsabe hosi munisipíu Bobonaro, munisípiu Baucau nian nian mak Laga, Baguia, Quelicai, Vemasse no Venilale, ba munisípiu Aileu nian mak Remexio, Laulara no Lequidoe.
Ba munisípiu Covalima mak postu administrativu Maucatar, Fatululik, Zumalai, Tilomar, Fohoren no Fatumea, ba munisípiu Lautém mak Tutuala, Iliomar, Lautém, Lore no Luro
Ba munisípiu Liquiça nian mak postu administrativu Bazartete, Maubara, no Loes, Ermera nian mak Hatulia A, Hatulia B, Atsabe, no ba munisípiu Manufahi mak Alas, Fatuberliu no Turiscai, Viqueque nian mak Ossu, Uatulari, Uatucarbau no Lacluta.
Ba munisípiu Ainaro mak Hatu Udo, Maubisse no Hatubuiliku, inklui asistente tékniku liña distribuisaun no produsaun ba munisípiu Ataúro.
Funsionáriu 74 ne’ebé hetan kontratu hosi EDTL, E.P ne’e kontratu servisu ba tékniku selesionadu hirak ne’e ho tipu termu-sertu no EDTL, E.P sei halo renovasaun bazea ba avaliasaun dezempeñu idak-idak.
Jornalista : Arminda Fonseca
Editor : Cancio Ximenes
