Grupu Haburas Rai kria atividade ortikultura iha área Planta LNG Beaço
VIQUEQUE, 04 fevereiru 2023 (TATOLI)—Vise prezidente grupu Habuaras, Julio soares, informa Grupu Haburas Rai sei kontinua kria atividade hortikultura hodi sustenta ba nesesidade uma laran, iha área planta Liquefied Natural Gas (LNG) Beaço, suku Maluru, postu administrativu Viqueque Villa, munisípiu Viqueque.
“Agora daudaun ita haree iha fatin-fatin ema hahú kria ortikultura, nune’e ami tuur hamutuk hodi kria grupu ortikultura ida-ne’e, ho objetivu ami atu sustenta ba ami-nia moris loro-loron nian. Hosi inisíu ami la’o esforsu rasik mak foin hetan apoiu hosi organizasaun sira,” Julio Soares hateten ba jornalista sira, iha to’os grupu Haburas Rai, suku Maluru, sábadu ne’e.
Nia hatutan, grupu Haburas Rai hahú harii 2022 ne’ebé hala’i liu ba atividade hanesan ortikutura hodi hala’o atividade kuda modo hodi faan iha merkadu Viqueqeu no balun faan ba komunidade besik área refere.
“Depois ami la’o ami hetan uluk apoiu hosi organizasaun Organizasaun Internasionál Adventist Development and Relief Agency (ADRA), sira apoia parte kapasitasaun kona-ba ortikultura oinsá kuda modo, kuidadu modo no oinsá jere osan. Nune’e, sira fó asisténsia durante tinan ida nia laran. Iha 2022, ami halo tan proposta ba Autoridade Nasionál Petroleu no Mina-Rai (ANPM), sira fó apoiu fundu $370,65.00 ba ami hodi reforsa ami-nia atividade ortikultura. Hosi orsamentu ne’e grupu Haburas Rai sosa materiál sira hanesan tanke profil, sosa modo musan, rede paranet,” nia dehan.
Daudaun ne’e, sira kuda kankun, brinjela, fore-tali, aimanas, repollu, modo mutin-metan, tomate, baria no hakiak ikan, nune’e mós grupu kira rai no empresta osan.
Hosi rezultadu kuda-modo sira-ne’e, grupu Haburas Rai lori direta ba faan iha merkadu, no negosiante sira balun sosa direta iha to’os laran no balun sira faan iha suku laran.
“Dezafiu ne’ebé ami enfrenta mak ular ki’ik sira estraga ami-nia modo, maibé ida-ne’e la signifika hamate ami-nia vontade serbisu. Oinsá kombate ular ki’ik sira-ne’e hodi ami bele hetan rendimentu di’ak hosi modo sira-ne’ebé ami kuda. Tanba hosi ami-nia produsaun ortikultura ida-ne’e kada loron hetan rendementu $7 no dala ruma hetan$10 hodi sustenta ba ami-nia moris loro-loron nian,” nia dehan.
Aleinde ne’e, nia dehan, ba futuru mak planta LNG Governu lori mai duni suku Maluru, grupu Haburas Rai prontu hodi dezloka ba área seluk ne’ebé mak la afeta ba fatin planta LNG hodi dezenvolve di’ak liután ortikultura iha munisípiu Viqueque.
“Se Governu dada duni kadoras mai Beaço, ami prontu koopera ho Governu hodi muda ami-nia atividade ortikultura ne’ebé daudaun ne’e sei la’o hela iha área afetadu planta LNG ida-ne’e,” bua hatetn.
Entretantu, Grupu Haburas Rai daudaun ne’e ninia membru hamutuk na’in-15 ne’ebé kompostu hosi feto na’in-sia (9) no mane na’in-neen (6).
Jornalista : Vitorino Lopes da Costa
Editór : Cancio Ximenes
