VIQUEQUE, 04 fevereiru 2023 (TATOLI)—Kamioneta ida ho xapa mátrikula 50.606 ho marka hakerek iha vidru oin “Gulter” ne’ebé tula sasán konstrusaun Uma Naroman ba Povu (UNP) monu iha área Okarata, suku Babulu, postu administrativu Uatulari, munisípiu Viqueque.
Xefe suku Babulu, postu Uatulari, munisípiu Viqueque, Mario Trindade, hateten kamioneta ne’e monu iha tuku 10h00 dadeersan, iha loron 03 fulan-fevereiru 2023 ne’e rezulta ema na’in rua (2) heta kanek.
“Horisehik akontese kamioneta ida monu, kamioneta ne’ebé tula sasán konstrusaun Uma Naroman ba Povu ba ha’u-nia suku, maibé to’o iha dalan kondisaun Estrada aat no sasán mós todan, kareta sa’e ba rai lolon forsa laiha no hakiduk fila ba kotuk mak baku monu ka baku fila,” Mario Trindade hateten ba Agência Tatoli, iha postu Uatulari, sábadu ne’e.
Autoridade lokál ne’e hatutan, kamioneta tula materiál konstrusaun hanesan sumente saka 100, besi no tripleks ne’ebé tula hosi postu Uatulari atu transporta ba Liasidi.
“Hosi asidente ne’e rezulta ita-nia membru ekipa jestaun suku (EJS) Valdimar hetan kanek no ida seluk, nune’e horisehik transporta kedas ba sentru saúde Uatulari hodi hetan tratamentu intensive,” nia hateten.
Daudaun ne’e, nia dehan, dalan liga ba suku Babulu kondisaun grave tebes hodi difikulta transporte sira halo distribuisaun materiál konstrusaun ba UNP ne’ebé agora la’o hela prosesu konstrusaun.
“Dalan liga ba ha’u-nia suku ne’e ha’u hato’o beibeik ba Governu, maibé laiha resposta ruma hodi hadi’a dalan liga ba suku. Tan ne’e, ha’u hakarak husu nafatin ba Governu hodi haree ba kondisaun dalan liga ba suku tanba iha tempu udan kondisaun grave liu,” nia dehan.
Aleinde ne’e, nia dehan, UNP+ A iha suku Babulu hetan uma unidade ualu (8), kada suku ida hetan uma ida (1), ne’ebé dadaun ne’e progresu atinje 25%, UNP+ B distribui zinku ba benifísiariu uma kain 37, enkuantu UKL faze daruak iha suku Babulo nian hetan uma unidade 12 no prosesu konstrusaun sei la’o hela.
Iha fatin seluk, enfermeira Maria Ximenes, relata vítama na’in rua família sira lori mai sentru saúde hodi fó tratamentu ba ema na’in-ida (1) mak kanek no na’in-ida (1) seluk kanek kmaan.
“Vítima Valdimar mak hetan kanek iha parte ain loos, la tohar. Hosirsehik, ami halo kurativu ba ninia kanek no horikalan nia baixa iha sentru hodi pesoal saúde sira halo observasaun ba ninia kanek. Ohin dadeersan mak nia fila ba uma. Enkuantu vítima ida seluk horisehik mai la kanek, maibé nonok de’it ne’ebé horisehik ami halo transferensia ba Internamentu Viqueque hodi leno vítima ninia laran,” nia hateten.
Jornalista: Vitorino Lopes da Costa
Editór : Cancio Ximenes
