COVALIMA, 05 fevereiru 2023 (TATOLI)– Partidu Libertasaun Populár (PLP), sábadu ne’e, realiza segundu konferénsia, iha munisipiu Covalima, hodi prepara estratéjia atu hasoru Eleisaun Parlamentár iha 2023 ne’e.
“PLP hahú halo preparasaun ba Eleisaun Parlamentár tinan 2023. Tanba ita-nia lei husu bainhira partidu hotu ne’ebé atu konkorre iha Eleisaun Parlamentar tenke iha kongresu, maibé molok hahú kongresu tenke iha konferénsia nivél munisípiu, hafoin kongresu iha nivél nasionál,” hateten Vise IV Prezidente Partidu PLP, Abel da Silva Pires, ba jornalista sira iha audian Covalima, domingu ne’e .
PLP hahú realiza konferensia iha territóriu nasionál ho tema “Hametin no Konsolida forsa polítika hodi atinje vitória iha Eleisaun Parlamentár 2023”.
“Iha konferénsia ida-ne’e PLP deside asuntu sira hanesan estratéjia nivél munisípiu, hafoin ita hili estrutura hodi hametin liután partidu ne’e”.
Iha biban hanesan, Prezidente Komisaun Organizadora, Hernani Doutel Lopes, reforsa konferénsia ne’e hanesan preparasaun atu hasoru Eleisaun Parlamentár tinan 2023.
“Ami sei uza polítika hodi hato’o informasaun kona-ba planu no programa hosi PLP iha nivél nasionál to’o baze”, nia afirma.
Segundu konferénsia Partidu Libertasaun Populár (PLP) ne’e partisipa hosi delegadu no delaga husi postu administrativu hitu kompostu hosi suku 30 no aldeia 148. Enkuantu konferénsista-sira kada aldeia ho delegadu na’in tolu, husi suku na’in-rua no kada postu administrativu-rua.
Tuir dadus delegadu ho delgada ne’ebé partisipa konferénsia ida-ne’e hamutuk 611.Konferénsia ne’e realiza tanba hetan fundu hosi sekretáriadu PLP hamutuk $12,400.
Jornalista : Celestina Teles
Editór : Florencio Miranda Ximenes
