DILI, 06 fevereiru 2023 (TATOLI) – Diretór Nasionál Saúde Públika iha Ministériu Saúde Frederico Bosco, informa durante 2022 moras Infesaun Vias Respiratóriu Aguda (ISPA ) mak domina iha territóriu nasionál hamutuk 111,247.
“Moras infensaun Vias Respiratóriu Aguda mak domina liu iha 2022, kompara ho moras sira seluk tanba moras ne’e afeta ba labarik idade tinan 1 to’o 4 hamutuk 111,247 iha fasilidade saúde iha teritóriu nasionál”, Diretór Nasionál Saúde Públika iha Ministériu Saúde Frederico Bosco hateten ba TATOLI iha nia kna’ar fatin Caicoli, ohin.
Tuir Frederico Bosco katak kazu diarea simples mak afeta liu ba labarik idade 1 to’o 4 iha fasilidade saúde sira hamutuk 31,507.
“Moras sira ne’e nia sintomas mak haree ba tempu bainhira udan monu rai depois para, rai rahun suar maka’as halo ema dada susar, depois labarik sira han hahan foer ka la moos entaun kauza hodi hetan moras diarea sira ne’e”, nia esplika.
Kona-ba tratamentu ISPA no diarea profisionál saúde sira fó atendimentu tuir kategoria moras ne’ebé mak iha, se sira mai isin manas fó aimrouk tuir nia moras, entaun durante ne’e mak médiku sira halo.
Tanba ne’e, atu halo prevensaun tenke lao sai uza maskara, fase liman halo moos molok atu han buat ruma, depois prepara aihan ho moos atu nune’e bele garante saúde ne’ebé mak saudável.
MS rejista kazu iha 2022, ne’ebé iha relasaun ho asidente tarfégu rodaviaru, asidente iha uma, no asidente iha servisu fatin hamutuk 10.900 ne’ebé mak halo tratamentu iha fasilidade saúde sira iha teritóriu nasionál.
Jornalista : Felicidade Ximenes
Editór : Zezito Silva
