DILI, 06 fevereiru 2023 (TATOLI)— Autoridade Inspesaun Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), hamutuk ho Organizasaun Mundiál Saúde (OMS), segunda ne’e, realiza formasaun kona-ba kontrolu ba risku ai-han iha Timor-Leste (TL).
Inspetór Jerál, AIFAESA,I.P, Ernesto Monteiro, hateten, programa formasaun ne’e atu hasa’e kapasidade iha setór Alimentar. Ho ida ne’e, nia mos fo agradese ba OMS tanba sempre no kontinua fó apoiu ba instituisaun Governu nian iha Timor-Leste.
Nia dehan, ida ne’e nu’udar formasaun dalarua nian ne’ebé OMS oferese ona ba pesoál tékniku hosi AIFAESA,I.P nomós ba funsionáriu sira hosi instituisaun Governu sira seluk hanesan, Ministériu Saude, Ministeriu Agrikultura no Pescas no Ministeriu Turizmu Komérsiu no Industria.
“Bainhira ita ko’alia kona-ba asuntu seguransa ai-han no ai-han seguru, ita presiza konsiente katak asuntu rua ne’e mai ho nia kontestu la hanesan. Bainhira ita ko’alia kona-ba seguransa ai-han, okazionalmente, ita rona asuntu sira ligadu ba situasaun hamlaha, estarvasaun, estokazen ai-han ka kona-na disponibilidade ai-han ba ema hotu,” Ernesto Monteiro, hateten iha Timor-Plaza, Dili.
Inspetór Jerál AIFAESA,I.P ne’e dehan, hosi lidun ida, bele konsiente katak bainhira ko’alia kona-ba ai-han seguru, sertamente ko’alia kualidade, seguru no kontaminasaun. Bainhira kualidade ai-han ida la di’ak ona, bele kria efeitu ruma ba ai-han ein-termus lakon sabór ka bele halo mudansa ba propriedade fiziku husi ai-han ne’e rasik.
“Parte seluk bainhira ai-han ida asosiadu ona ho risku, ida-ne’e problematiku tebes, tanba bele kauza perigu no bele halakon ema-nia vida. Ko’alia kona-ba risku ai-han, hanesan imi hotu hatene ona, asuntu ida-ne’e iha ninia interligasaun entre korrente kontaminasaun oin tolu, hanesan kontaminasaun kruzada husi mikro-organizmu, kontaminasaun kímiku no fizíku,” nia hateten.
Nia mos husu atu ema hotu ne’ebe tuir formasaun ne’e atu aproveita ho didiak. “Tanba programa ida-ne’e, laós de’it atu fó benefisia ba imi iha imi-nia karreira, maibé bele tulun imi hodi tulun hikas imi-nia instituisaun hodi redús, buat ne’ebé ema bolu, Food-Borne Diseases, ka moras sira ne’ebé kauza husi ai-han hodi halakon vida umana,” Ernesto hateten.
Nia dehan, programa formasaun refere, organiza liuhosi koordenasaun entre AIFAESA ho OMS ne’ebé, formadór sira ba programa ida-ne’e, kompostu hosi pesoȧl kualifikadu sira ho kompeténsia téknika ne’ebé aas iha área ai-han seguru, laboratóriu alimentár nomós área oioin.
Iha fatin hanesan, reprezentante OMS iha Timor-Leste, Thelge Sudath Rohana Peiris, hateten, ko’alia kona-ba kontrolu ba risku ai-han iha Timor-Leste ne’e importante tanba ai-han seguru nu’udar elementu importante ida ba sistema saúde públiku. Bainhira konsume ai-han neʼebé la seguru bele fó impaktu hamosu moras oioin ne’ebé fó naha todan ba nasaun ida.
“Iha rejiaun sudeste aziátiku, naha moras kauza hosi hahan no estimasaun liuhosi moras reziliénsia nasional sistema ai-han ne’e hamutuk millaun 150 no mate millaun 175 kada tinan, ne’e hatudu, ai-han seguru nu’udar parte integral ida hosi seguransa alimentar,” nia dehan.
Bainhira ai-han la seguru, sei la favorese ba konsumu umanu no sei halakon gastu ba ai-han sira ne’e. Atu atinje meta katak ai-han hotu seguru sei kontribui ba hasa’e kualidade, ho ida ne’e, Governu tenke asegura hodi hasa’e kapasidade fornesimentu ai-han de’it la sufisiente, bainhira ai-han la seguru no nutritivu.
“Tenke hahú ona dezenvolve no fortalese sistema nasional kontrolu ai-han, atu nune’e bele proteje konsumedór sira hosi risku moras oioin ne’ebe hamosu hosi produtu ai-han ne’ebé la seguru. Ida ne’e nu’udar responsabilidade hosi Governu hodi estabelese plataforma legal no institusional ne’ebé harmoniza iha sistema kontrolu ai-han,” nia dehan.
Aleinde ne’e, rekursu fundamentu mós tenke aloka hodi fasilita funsionamentu kontrolu iha nivel nasional, tantu hosi produsaun doméstiku nune’e mós ba produtu importadu sira.
Inspesaun ai-han nu’udar parte sentral hosi funsionamentu kontrolu, hodi verifika katak tipu no nivel operadór negósiu sira iha rai-laran hala’o duni sira-nia responsabilidade primária ho produs ai-han ne’ebé seguru ba konsumedór.
“Ho razaun ida ne’e, inspetór ai-han sira ne’ebé ho abilidade no kuñesimentu iha papél ne’ebé importante. Prosedimentu eskrita, presiza dezenvolve no refere ba guia no dokumentu ne’ebé disponvivel nu’udar padraun internasional, suporta ho feramentu sira ne’ebé sufisiente no infrastrutura hodi fornese atividade kontrolu ne’ebé konsistente hodi implementa aproximasaun bazeia ba risku,” reprezenta OMS ne’e hateten.
Jornalista : Arminda Fonseca
Editora : Armandina Moniz
