iklan

NASIONÁL, POLÍTIKA

Deputadu PD lamenta médiku la akompaña inan isin-rua partu bebé mate

Deputadu PD lamenta médiku la akompaña inan isin-rua partu bebé mate

Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, 06 fevereiru 2023 (TATOLI)—Deputadu bankada Partidu Demokrátiku (PD) iha Parlamentu Nasionál (PN), Andriano do Nacimento, lamenta ho atendimentu ospitál Maliana ne’ebé laiha akompañamentu médiku rezulta inan isin-rua partu bebe hakotu iis bainhira transporta mai Dili.

“Primeiru hakarak hato’o lamentasaun krítika ba Ministru Saúde liu-liu serbisu atendimentu ospitál Maliana, iha sesta semana kotuk, ha’u-nia alin feto balun moras no isin-rua transfere hosi Lolotoe mai iha Maliana, depois sira iha ospitál Maliana dehan atende labele haruka mai Dili, infelismete laiha ema ida tuir só haruka de’it nia laen no nia aman mak mai Dili ho kondutór.  Mai to’o tiha antes Atabae labarik moris iha dalan, labarik moris iha de’it nia aman no inan atu halo nusá. Mai lori to’o tiha iha klínika Atabae nian haruka mai Dili no to’o Liquiça labarik mate no hosi Liquiça mai to’o Ospitál Nasionál Guido Valedares (HNGV) labarik nia inan mós mate tan,” nia hato’o iha plenária PN.

Deputadu ne’e kritika Ministra Saúde no diretór ospitál Maliana ne’ebé lakohi salva ema-nia vida.

“Ema inan ho oan mate dala ida iha dalan, depois tun mai ospitál mate tan. Sábadu ne’e mak ami lori fila ba Lolotoe. Sá atendimentu mak ne’e, ema isin rua hosik de’it hanesan ne’e moris iha dalan klaran mate no mai to’o ospitál mate,” nia lamenta.

Deputadu hosi bankada opozisaun ne’e husu MAPKOMS atu hato’o ba Primeiru-Ministru hadomi povu ka lae, se hadomi povu presiza tratamentu hanesan.

“Sá ospitál ida mak ema moras todan laiha doutór ida akompaña, ne’e serbisu ida halo hau aseita kondena ema na’in rua mate dalan klaran iha ukun an ida ne’e, ne’e ema nia vida ita hakarak halimar, husu responsabilidade diretór ho Ministra Saúde atu petcat’’ Nia kestiona

Hatán ba ida ne’e, Ministru trata asuntu Parlamentár no Komunikasaun Sosiál (MAPKOMS), Francisco Jerónimo, hateten iha lamentasaun ne’ebé hato’o katak ida ne’e eru umanu halo hanoin sei buka tuir nafatin.

Tan ne’e, sei informa ba Ministru Saúde atu bele fó atensaun no se bele loke investigasaun tanbasá mak kazu ne’e akontese.

“Ida-ne’ebé mak ita presiza fó atensaun ba ita-nia ema sira-ne’e, atu nune’e sira bele moris ho isin di’ak iha rai ne’e. Ami mós hodi Governu nia naran hato’o sentidu kondolénsia ba família tomak,” Governante ne’e hateten.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!