DILI, 06 fevereiru 2023 (TATOLI) – Prezidente Repúblika (PR), José Ramos Horta, bolu Partidu Frente Revolusionária Timor-Leste Independente (FRETILIN) hodi rona opiniaun molok dekreta loron Eleisaun Parlamentár 2023.
Iha enkontru ho Xefe Estadu marka prezensa husi estrutura partidu mak Prezidente FRETILIN, Francisco Guterres ‘Lú Olo’, Sekretáriu-Jerál, Mari Alkatiri, Aniceto Guterres (atuál Prezidente Parlamentu Nasionál), José Maria dos Reis (atuál Vise-Primeiru-Ministru), Tenente-Jenerál Reformadu, Lere Anan Timur no seluk tan.
“Marka loron eleisaun ne’e kompeténsia Prezidente Repúblika nian. Ami fó opiniaun ba Prezidente, la’ós ba públiku. Enkontru ne’e di’ak tebes no Prezidente Repúblika iha preokupasaun barak hahú hosi desizaun atu labele kontra konstituisaun. Iha fatór seluk-tan mak ita tenke konsidera, tanba ita-nian Prezidente reprezenta ita iha rai-laran no iha rai-li’ur”, Mari Alkatiri informa hafoin reuniaun, iha Palásiu Prezidensiál, Bairru Pité.
Sekretáriu-Jerál FRETILIN ne’e dehan enkontru ida ne’e la’ós finál no Xefe Estadu sei hasoru malu mós ho sosiedade sivíl no sira seluk-tan.
“Labele kontra konstituisaun ne’e normál. Ne’e aktu polítiku ida husi Prezidente Repúblika nian, maibé iha Konstituisaun rasik define ona rekizitu para desizaun ne’e bele halo. Fundamentalmente, Prezidente nia preokupasaun ne’e furak tebes tanba data eleisaun ne’ebé nia marka sosiedade tomak bele aseita”, nia esklarese.
Eis-Primeiru-Ministru ne’e afirma FRETILIN dezde moris nia preokupasaun mak povu, Estadu no nasaun, tanba atu kontribui ba povu nia di’ak, hametin Estadu, harii nasaun. Ba solusaun ne’ebé de’it FRETILIN bele kontribui. “Maibé, Estadu ne’e atu sai Estadu Direitu no Demokrátiku ita tenke tau Konstituisaun no lei iha leten”, nia konklui.
Antes ne’e, Xefe Estadu hala’o ona enkontru ho partidu sira ne’ebé asentu iha Parlaemntu hanesan Partidu Kongresu Nasionál ba Rekonstrusaun Timor-Leste (CNRT, sigla portugés), Partidu Demokrátiku (PD), Frente Mudansa, Partidu Uniaun Demokrátika Timorense (UDT), Partidu Unidade Dezenvolvimentu Demokrátiku (PUDD), Partidu Kmanek Haburas Unidade Nasionál Timoroan (KHUNTO) no Partidu Libertasaun Populár (PLP).
Notísia relevante: CNRT preparadu kompete iha eleisaun parlamentár 2023
Jornalista: Antónia Gusmão
Editora: Maria Auxiliadora
